भोटेकोशी–त्रिशूली विपद् अध्ययन गर्न ३ महिनाको समयसहित संसदीय विशेष समिति गठन

काठमाडौँ, ५ असोज । भोटेकोशी बाढी तथा हिमाली क्षेत्रमा जलवायु परिवर्तनको प्रभावबारे अध्ययन गर्न प्रतिनिधिसभाले संसदीय विशेष समिति गठन गरेको छ ।सोमबार बसेको प्रतिनिधिसभा बैठकमा सभामुख डोलप्रसाद अर्यालले समिति गठनको प्रस्ताव प्रस्तुत गरेका हुन् ।

समितिको नाम ‘हिमालमा जलवायु परिवर्तनको प्रभाव, जलवायु न्याय तथा भोटेकोशी त्रिशूली विपद् सम्बन्धी संसदीय विशेष समिति’ राखिएको छ ।समितिले हिमाली क्षेत्रमा जलवायु परिवर्तनको प्रभाव र भोटेकोशी–त्रिशूली विपद्सम्बन्धी विषयमा अध्ययन गर्नेछ । अध्ययनका आधारमा सरकारलाई आवश्यक नीतिगत सुझाव दिने जिम्मेवारी समितिलाई दिइएको छ । समितिले आफ्नो काम सम्पन्न गर्न ३ महिनाको समय पाएको छ ।

समितिमा अच्युतम लामिछाने, अनुष्का श्रेष्ठ, गंगादेवी श्रेष्ठ, गणेश पराजुली, धनन्जय रेग्मी, निशा डाँगी, ध्रुवराज राई, पुष्पराज कँडेल र मोहन आचार्य रहेका छन् ।त्यसैगरी मिङ्मा ग्याबु शेर्पा, रमेश कुमार मल्ल, रवीन्द्र पटेल, सरस्वती लामा, सुजता तामाङ र सीता थपलिया पनि समितिका सदस्य छन् । सभामुख अर्यालका अनुसार समितिको पहिलो बैठकले सदस्यहरूमध्येबाट एक जनालाई सभापति चयन गर्नेछ ।