- ३० आश्विन २०८३, शुक्रबार / Oct 16, 2026
काठमाडौँ, ५ असोज । काठमाडौँको त्रिपुरेश्वरमा रिद्धिसिद्धि यातायातको मिनीबसमा आगलागी हुनुअघि चालक र ट्राफिक प्रहरीबीच विवाद भएको खुलेको छ ।ट्राफिक नियम उल्लङ्घन गरेको भन्दै प्रहरीले कारबाही गर्न खोजेपछि चालकले प्रतिवाद गरेको स्थानीयले बताएका छन् ।
हर्न बजाएको विषयमा विवाद भएको हुन सक्ने बताइए पनि घटनाको वास्तविक कारण अनुसन्धानपछि मात्रै यकिन हुने काठमाडौँ प्रहरीले जनाएको छ । राहदानी विभाग अगाडि रहेको बस स्टपमा बा ५ ख ४२७४ नम्बरको मिनीबसमा आगो लागेपछि सुरक्षाकर्मीहरूले भित्रबाट लक गरिएको ढोका फोरेर चालकलाई बाहिर निकालेका थिए ।
आगलागीमा परी २५ वर्षीय चालक दावा लामा गम्भीर घाइते भएका छन् । उनको शरीरको अधिकांश भाग जलेको जनाइएको छ । लामाको बर्न अस्पतालमा उपचार भइरहेको छ ।
प्रहरीका अनुसार बस सडक किनारमा पार्किङ गरेर चालकले नै आगो लगाएको हुन सक्ने प्रारम्भिक अनुमान गरिएको छ । घटनाबारे थप अनुसन्धान भइरहेको प्रहरीले जनाएको छ ।
