काठमाडौँ, २८ साउन । श्री बौद्धनाथ क्षेत्र विकास समितिले धार्मिक सहिष्णुता अझ मजबुत बनाउन लामा, बज्राचार्य र ब्राह्मण गुरूहरूबाट महाङ्कालको पूजाअर्चना गरी ऐतिहासिक बौद्ध महाङ्काल जात्रा मनाएको छ। मङ्गलबार बौद्ध महाङ्काल चौर प्राङ्गणमा लामा, बज्राचार्य र ब्राह्मण गुरूहरूले आ–आफ्नो धार्मिक विधि–पद्धतिअनुरूप यज्ञ मण्डप स्थापना गरी महाङ्कालको पूजाअर्चना गरेका हुन ।

हिन्दू एवं बौद्ध धर्मावलम्बीहरूको बाक्लो उपस्थितिमा सम्पन्न यो दृश्य अत्यन्त मनमोहक देखिएको थियो। पूजामा संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे र रक्षामन्त्री मानवीर राईले समेत उपस्थित रही, गुरूहरूले गरेका पूजापद्धतिको अवलोकन गरेका थिए। उनीहरूले महाङ्कालको पूजा गरी प्रसाद ग्रहण गर्दै समितिले धार्मिक सहिष्णुता कायम राख्न गरेको प्रयासको प्रशंसा गरे।

हिन्दू र बौद्ध धर्मावलम्बी दुवैले महाङ्कालप्रति समान आस्था राख्ने हुँदा यस प्रकारको सहअस्तित्वको संस्कृति सधैं कायम रहोस् भन्ने कामनासहित पूजाअर्चना गरिएको समितिका कार्यकारी निर्देशक मोहनकुमार लामाले बताए। पूजाअर्चना सम्पन्न भएपछि प्रसाद ग्रहणसँगै ऐतिहासिक बौद्ध महाङ्काल जात्राको विधिवत् रूपमा सुरूवात गरिएको थियो।

बुटवल, २७ वैशाख । २५६९औं बुद्ध जयन्ती तथा लुम्बिनी दिवस २०८२ तीन दिनसम्म विविध कार्यक्रमसहित भव्य रूपमा मनाइने भएको छ। यसका लागि लुम्बिनी विकास कोषले एक करोड रुपैयाँ बजेट विनियोजन गरेको छ।

कोषले शनिबार आयोजित पत्रकार सम्मेलनमार्फत वैशाख २८ देखि ३० गतेसम्म रुपन्देही, कपिलवस्तु र नवलपरासी जिल्लाहरूमा कार्यक्रमहरू सञ्चालन हुने जानकारी दिएको हो। कोषका उपाध्यक्ष डा. ल्हारक्याल लामाका अनुसार बुद्ध जयन्तीलाई त्रिविध पुण्य तिथिका रूपमा तीन दिनसम्म विशेष कार्यक्रमसहित मनाइनेछ।

गौतम बुद्धको जन्म, ज्ञान प्राप्ति र महापरिनिर्वाण एकै दिन परेको बौद्ध पूर्णिमाको ऐतिहासिक महत्त्वका कारण बुद्ध जयन्तीलाई विशेष रूपमा मनाउन लागिएको हो। यस पटक लुम्बिनी, रामग्राम, तिलौराकोट, देवदहलगायत स्थानमा सरसफाइ, दीप प्रज्वलन, नाट्य प्रस्तुति, रक्तदान, आँखा शिविर, शान्ति ध्यान, खेलकुद प्रतियोगिता तथा शाकाहारी खाना महोत्सवजस्ता कार्यक्रम आयोजना गरिने छन्।

यस वर्ष बुद्ध जयन्ती मनाउन संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेको संयोजकत्वमा ५६९ सदस्यीय मूल समिति गठन गरिएको छ। साथै विभिन्न व्यवस्थापन, सुरक्षा, प्रचारप्रसार, शोभायात्रा, भोजन व्यवस्थापन, सरसफाइ, प्रकाशनलगायतका उपसमितिहरू समेत गठन गरिएको छ।

वैशाख २९ गते लुम्बिनीमा प्रधानमन्त्री केपी शर्मा ओलीको प्रमुख आतिथ्यमा अन्तर्राष्ट्रिय बौद्ध सम्मेलन आयोजना हुनेछ। सोही दिन विहान ६ बजे प्रार्थना सभा र ७:३० बजे शोभायात्रा सञ्चालन हुनेछ।

वैशाख ३० गते बोधिसत्व सिद्धार्थको शोभायात्रा लुम्बिनीबाट कपिलवस्तुसम्म गरिनेछ, जसले बुद्धकालीन यात्रा मार्गको पुनः स्मरण गराउनेछ।

लुम्बिनी विकास कोषले बुद्ध जयन्तीको अवसरमा सबै नागरिकलाई दीप प्रज्वलन गरेर बुद्धको शिक्षाप्रति सम्मान प्रकट गर्न आग्रह गरेको छ।