- २ कार्तिक २०८३, सोमबार / Oct 19, 2026
काठमाडौं, १३ असार । नेपालमा मनसुन भित्रिएको एक साताभन्दा बढी समय बितिसक्दा पनि मनसुन प्रणाली अझै पूर्ण रूपमा सक्रिय हुन सकेको छैन। पर्याप्त वर्षा नहुँदा देशका अधिकांश क्षेत्रमा गर्मी बढेको छ भने धान रोपाइँ पनि अपेक्षित रूपमा अघि बढ्न सकेको छैन।
जल तथा मौसम विज्ञान विभागका अनुसार जुन १ देखि २५ तारिखसम्म देशभर औसत १४९ मिलिमिटर वर्षा भएको छ, जुन यस अवधिको औसत २१४ मिलिमिटरको ६९.६ प्रतिशत मात्र हो। विभागले दैनिक औसतको ९० प्रतिशतभन्दा कम वर्षा भएको जनाएको छ।
विभागका अनुसार महिनाको सुरुआती दिनमा वर्षा अत्यन्त न्यून भएको थियो। पछिल्ला दिनमा केही सुधार देखिए पनि वर्षा अझै सामान्य अवस्थासम्म पुग्न सकेको छैन।
मौसमविद्का अनुसार यस वर्ष मनसुन नेपालमा सरदरभन्दा ढिलो प्रवेश गर्नुका साथै प्रारम्भिक चरणमै कमजोर रहेकाले वर्षा कम भएको हो। यसको असर कृषि, जलस्रोत व्यवस्थापन तथा खानेपानी आपूर्तिमा समेत पर्न सक्ने चिन्ता व्यक्त गरिएको छ।
हाल मनसुन कोशीदेखि लुम्बिनीसम्मका केही भूभागमा मात्रै सीमित रहेको छ। देशका बाँकी क्षेत्रमा मनसुन विस्तार हुन अझै केही दिन लाग्ने मौसमविदहरूको अनुमान छ। गएराति भने पूर्वदेखि पश्चिमसम्मका धेरै स्थानमा वर्षा भएको थियो।
आज कोशी प्रदेशका तराईका केही स्थान, मधेशका थोरै भूभाग तथा बागमती, गण्डकी र लुम्बिनी प्रदेशका तराईका एक–दुई स्थानमा मेघगर्जन र चट्याङसहित मध्यम वर्षाको सम्भावना रहेको छ।
मौसम पूर्वानुमान महाशाखाका अनुसार लुम्बिनी र सुदूरपश्चिमका तराई क्षेत्रमा तातो लहर (हिटवेभ) को सम्भावना रहेको छ भने आज राति कोशी प्रदेशका पहाडी तथा तराईका एक–दुई स्थानमा भारी वर्षा हुन सक्ने अनुमान गरिएको छ।
