- १० आश्विन २०८३, शनिबार / Sep 26, 2026
काठमाडौं, १३ असार । नेपाल प्रहरीको केन्द्रीय अनुसन्धान ब्युरो (सीआईबी)ले अखिल नेपाल फुटबल सङ्घ (एन्फा)का पूर्वअध्यक्ष कर्मा छिरिङ शेर्पालाई ठगी तथा आपराधिक विश्वासघातसम्बन्धी आरोपमा पक्राउ गरेको छ।
सीआईबीको टोलीले शेर्पालाई शुक्रबार साँझ काठमाडौंको बुढानीलकण्ठस्थित गणेश चोकबाट पक्राउ गरेको हो। ब्युरोका प्रवक्ता प्रहरी वरिष्ठ उपरीक्षक (एसएसपी) अनुपम शमशेर जबराका अनुसार टुङ्गराम इन्टरनेशनल एकेडेमीको ८ करोड ७८ लाख ३० हजार रुपैयाँ अपचलन गरेको आरोपमा उनीमाथि अनुसन्धान भइरहेको छ।
प्रहरीका अनुसार विद्यालयको कार्यकारी प्रमुखका रूपमा कार्यरत रहँदा शेर्पाले विभिन्न प्रपञ्चमार्फत व्यक्तिगत लाभ लिँदै विद्यालयलाई आर्थिक क्षति पुर्याएको आरोप लागेको छ।
अनुसन्धानका क्रममा भक्तपुरको दधिकोटस्थित २९ रोपनी ४ आना जग्गा आफ्नै स्वामित्वको कम्पनीमा बिक्री गरेको तथ्यसमेत फेला परेको सीआईबीले जनाएको छ।
हाल शेर्पामाथि ठगी तथा आपराधिक विश्वासघातसम्बन्धी कसुरमा थप अनुसन्धान भइरहेको प्रहरीले जनाएको छ।
