पर्सा, १५ जेठ । चालु आर्थिक वर्षको १० महिनामा वीरगञ्ज नाकाबाट करिब ८८ अर्ब २२ करोड रुपैयाँ बराबरका वस्तु तथा सामान निर्यात भएको छ।

गत आर्थिक वर्षको सोही अवधिमा ८३ अर्ब २५ करोड रुपैयाँ बराबरका वस्तु तथा सेवा निर्यात भएका थिए। वीरगञ्ज भन्सार कार्यालयका सूचना अधिकारी उदयसिंह विष्टका अनुसार यस वर्ष निर्यातमा वृद्धि देखिएको छ।

चालु आर्थिक वर्षको १० महिनामा सबैभन्दा बढी भटमासको प्रशोधित तेल निर्यात भएको छ, जसको मूल्य ४८ अर्ब ११ करोड रुपैयाँ बराबर छ। त्यसैगरी प्रशोधित सूर्यमुखी तेल पाँच अर्ब ३५ करोड रुपैयाँ र फलफूलको रस ६ अर्ब ४२ करोड रुपैयाँ बराबर निर्यात भएको छ।

त्यसैगरी कपडा तीन अर्ब तीन करोड रुपैयाँ र सिन्थेटिक यार्न दुई अर्ब २५ करोड रुपैयाँ बराबर निर्यात भएको भन्सार कार्यालयले जनाएको छ। वीरगञ्ज नाका नेपालको प्रमुख व्यापारिक नाका भएकाले यहाँबाट हुने निर्यातले मुलुकको वैदेशिक व्यापारमा महत्वपूर्ण योगदान पुर्‍याउँदै आएको छ।

मुख्य बुँदा 

तीन महिनामा रु २ खर्ब १८ अर्ब बराबरका सामान आयात

गत वर्षको तुलनामा १९ प्रतिशत (रु ३४ अर्ब २३ करोड) वृद्धि

पेट्रोलियम पदार्थ, फलाम र मेसिनरी मुख्य आयात वस्तु

भटमासको तेल, मलखाद, कपडा, र सवारी पार्टपुर्जाको आयात उच्च

वीरगञ्ज नाका नेपालको प्रमुख व्यापारिक नाका

पर्सा, २२ कार्तिक । वीरगञ्ज नाका हुँदै चालु आर्थिक वर्षको तीन महिनामा रु दुई खर्ब १८ अर्ब १० करोड मूल्य पर्ने को सामान आयात भएका छन् ।

गत आवको तीन महिनाको तुलनामा चालु आवको सोही अवधिमा आयात १९ प्रतिशत वृद्धि अर्थात् रु ३४ अर्ब २३ करोड बढीका सामान आयात भएको छ । वीरगञ्ज भन्सार कार्यालयका अनुसार गत आवको तीन महिनाको अवधिमा भने रु एक खर्ब ८३ अर्ब ८७ करोड मूल्य पर्ने वस्तु तथा सामान भित्रिएको थियो ।

वीरगञ्ज भन्सार कार्यालयका प्रमुख भन्सार प्रशासक विष्णुप्रसाद ज्ञवालीले वीरगञ्ज नाका हुँदै चालु आवको तीन महिनामा आयात ह्वात्तै बढेको जानकारी दिए। वीरगञ्ज नाका हुँदै तीन महिनामा रु ३८ अर्ब नौ करोड मूल्य पर्ने पेट्रोलियम पदार्थ आयात भएको छ । रु १९ अर्ब ८४ करोड मूल्य पर्ने फलाम तथा फलामबाट बनेका सामान आयात भएका छन् ।

सोही अवधिमा रु १५ अर्ब ५७ करोड मूल्य पर्ने मेसिनरी तथा पार्टपुर्जा आयात भएको छ । रु १४ अर्ब ८० करोड मूल्य पर्ने भटमासको कच्चा तेल आयात भएको छ । त्यस्तै रु १२ अर्ब ८१ करोड मूल्य पर्ने मलखाद आयात भएको छ । रु १२ अर्ब १६ करोड मूल्य पर्ने सबै प्रकारका कपडा आयात भएको छ ।

रु १२ अर्ब छ करोड मूल्य पर्ने इलेक्ट्रिक मेसिनरी, उपकरण र तीनका पार्टपुजा आयात भएका छन् । सोही अवधिमा रु १० अर्ब १२ करोड मूल्य पर्ने यातायातका साधन र तिनका पार्टपुर्जा आयात भएको वीरगञ्ज भन्सार कार्यालयले जनाएको छ । रासस

काठमाण्डौ, ३१ भदौ । चालू आर्थिक वर्ष २०८१/८२ को पहिलो महिनामा नेपालले १ खर्ब १९ अर्ब ११ करोड रुपैयाँ बराबरको व्यापार घाटा बेहोरेको छ । नेपाल राष्ट्र बैंकले सार्वजनिक गरेको विवरणअनुसार गत साउन महिनामा व्यापार घाटा अघिल्लो वर्षको सोही अवधिभन्दा २.५ प्रतिशतले बढेको हो ।

यस अवधिमा कुल वस्तु आयात ११.४ प्रतिशतले बढेर १ खर्ब ४३ अर्ब ४ करोड रुपैयाँ पुगेको छ । अघिल्लो वर्षको सोही महिनामा भने आयातमा ०.६ प्रतिशतले कमी आएको थियो । यस्तै, साउन महिनामा निर्यात पनि उल्लेख्य रूपमा बढेको छ ।

कुल वस्तु निर्यात ९५.७ प्रतिशतले बढेर २३ अर्ब ९३ करोड रुपैयाँ पुगेको छ । अघिल्लो वर्ष सोही अवधिमा निर्यात ९.६ प्रतिशतले घटेको थियो । वस्तुगत आधारमा भटमासको तेल, पाम तेल, पोलिस्टर धागो, अलैँची, जुटका सामानको निर्यात बढेको छ भने जिङ्क सिट, पार्टिकल बोर्ड, ऊनी गलैँचा, पिना र चियाको निर्यात घटेको राष्ट्र बैंकले जनाएको छ ।

नेपालको आयात वृद्धिसँगै निर्यातमा पनि फड्को मारिए तापनि आयात–निर्यातको ठूलो अन्तरका कारण व्यापार घाटा अझै उच्च स्तरमै कायम रहेको देखिन्छ ।