मुख्य बुँदा

दशैँ नजिकिएसँगै काठमाडौँबाट बाहिरिने हवाई भाडा महँगियो

विमान कम्पनीहरूले न्यूनतम मूल्यमा टिकट बिक्री बन्द, अधिकतम मूल्यमा टिकट बिक्री

धनगढीको टिकट भोलि र पर्सी १६ हजार रुपैयाँभन्दा कममा छैन

काठमाडौं–सुर्खेत, काठमाडौं–नेपालगञ्ज र काठमाडौं–भद्रपुर मार्गमा टिकट मूल्य उल्लेखनीय वृद्धि

सामान्य नागरिक, बिरामी र अत्यावश्यक यात्रु प्रभावित

काठमाडौँ, ४ असाेज । बडादशैँ नजिकिएसँगै काठमाडौँबाट बाहिरिने गन्तव्यको हवाई भाडा महँगिएको छ। वायुसेवा प्रदायकहरूले न्यूनतम मूल्यमा टिकट बेच्न छोडेका छन्। विमान कम्पनीहरूले अधिकतम मूल्यमै टिकट बिक्री गर्न थालेपछि यात्रु मारमा परेका छन्।

धनगढीका लागि आज कुनै उडान छैन। भोलि र पर्सी १६ हजारभन्दा कम मूल्यमा टिकट उपलब्ध छैन। मंगलबार भने न्यूनतम १२ हजार रुपैयाँ मूल्यमा टिकट अनलाइन प्लेटफर्ममा देखिएका छन्। दशैँमा काठमाडौँबाट धनगढी जाने यात्रुको संख्या धेरै हुने भएकाले टिकट अत्यधिक महँगो भएको हो।

यता, धनगढीबाट काठमाडौं फर्किने भाडा सात हजार आसपास छ। शनिबार धनगढी–काठमाडौंको टिकट ६ हजार ९०० रुपैयाँमा उपलब्ध छ। सामान्य नागरिक, बिरामी र अत्यावश्यक कामका लागि यात्रा गर्नेहरू मारमा परेको गुनासो गरेका छन्।

सामान्यतया काठमाडौँ–सुर्खेत मार्गमा टिकट साढे सात हजार रुपैयाँमा उपलब्ध हुन्थ्यो, अहिले १० हजारभन्दा कममा टिकट पाइँदैन। काठमाडौँ–भद्रपुरको भाडा सात हजार आसपास पुगेको छ भने भद्रपुर–काठमाडौँ पाँच हजार ७०० रुपैयाँमै आउन सकिन्छ।

काठमाडौं–नेपालगञ्ज रुटमा पनि टिकट मूल्य दुई–तीन हजार रुपैयाँसम्म बढेको छ। काठमाडौं–नेपालगञ्ज जाने भाडा आठ हजार ३०० रुपैयाँसम्म पुगेको छ, आउँने भाडा पाँच हजार ४ सय रुपैयाँ रहेको छ।