एजेन्सी, ३१ असार । रुस-युक्रेन युद्ध रोक्न थुप्रै प्रयास भइरहेका बेला पनि रूसी आक्रमण नरोकिएपछि अमेरिकी राष्ट्रपति डोनाल्ड ट्रम्पले युक्रेनलाई थप सैन्य सहयोग दिने घोषणा गरेका छन् । बीबीसीका अनुसार राष्ट्रपति ट्रम्पले युक्रेनलाई अत्याधुनिक पैट्रियट हवाई प्रतिरक्षा प्रणाली (Patriot Air Defense System) पठाउने घोषणा गर्नुभएको हो। ट्रम्पले यसअघि पनि युक्रेनलाई महँगा र आधुनिक हतियार पठाउने योजना सार्वजनिक गरिसक्नुभएको थियो।

नाटो प्रमुख मार्क रुटेसँगको भेटपछि, ट्रम्पले युरोपेली देशहरूलाई युक्रेन सहयोगका लागि अमेरिकी पैट्रियट प्रणाली प्रयोग गर्न आग्रह गर्नुभएको छ। रुटेले युक्रेनलाई आवश्यक सैन्य सामग्री युरोपमै व्यवस्थापन गरिने र त्यसको आर्थिक बोझ युरोपेली मुलुकहरूले बहन गर्ने जानकारी दिनुभएको छ।

ट्रम्पले चेतावनी दिँदै भने,“५० दिनभित्र शान्ति सम्झौता नभए रुससँग व्यापार गर्ने मुलुकहरूमाथि १०० प्रतिशत भन्सार कर लगाइनेछ।” उनले रुसी राष्ट्रपति भ्लादिमिर पुटिनलाई ‘कडा मान्छे’ भन्दै कूटनीतिले मात्र समाधान नहुने दाबी गरे । ट्रम्पको यस्तो कडा भाषामा आएको अभिव्यक्ति पछिल्ला दिनमा रुसप्रति अमेरिकाको आक्रोशपूर्ण धारणा प्रकट भएको संकेत मानिएको छ।

युक्रेनी राष्ट्रपति भ्लोदिमिर जेलेन्स्कीले ट्रम्पको घोषणालाई स्वागत गर्दै सहकार्यलाई अझ प्रभावकारी बनाउने प्रतिबद्धता जनाउनुभएको छ। हालसम्म रुसको औपचारिक प्रतिक्रिया आएको छैन। तर रूसी विश्लेषकहरूले ट्रम्पको भनाइलाई “खाली धम्की” भन्दै खारेज गरेका छन्।

युद्धले तीन वर्ष पार गरिसकेको अवस्थामा अमेरिकाले यसअघि घोषणा गरेको हथियार आपूर्ति रोक्ने निर्णय उल्टाउँदै ट्रम्पले नयाँ सम्झौता घोषणा गर्नुभएको हो। नयाँ सम्झौताअनुसार युक्रेनमा पठाइने केही हतियारको भुक्तानी नाटोबाट गरिनेछ, जसले युरोप-अमेरिका सहयोगलाई थप मजबुत बनाउने संकेत गर्छ।