काठमाडौँ, २० जेठ । भारत भ्रमणमा रहेका राष्ट्रिय स्वतन्त्र पार्टी (रास्वपा) का सभापति रवि लामिछाने र भारतका गृहमन्त्री अमित शाहबीच भेटवार्ता भएको छ।

रास्वपाका अनुसार भेटका क्रममा नेपाल–भारत सम्बन्ध, आपसी हितका विषय, लोकतान्त्रिक अभ्यास, सुरक्षा सहकार्य तथा दुवै देशका राजनीतिक दलहरूबीच संवाद र सहकार्य विस्तारका विषयमा विचार आदानप्रदान भएको थियो।

सभापति लामिछाने भारतीय जनता पार्टी (भाजपा) का अध्यक्ष नीतिन नवीनको निमन्त्रणामा पाँचदिने भारत भ्रमणका लागि जेठ १८ गते भारत गएका हुन्। भारत भ्रमणका क्रममा उनले विभिन्न राजनीतिक तथा कूटनीतिक भेटघाटलाई निरन्तरता दिइरहेका छन्।

लामिछाने नेतृत्वको प्रतिनिधिमण्डलमा उनकी धर्मपत्नी नीकिता पौडेल, रास्वपाका सहमहामन्त्री तथा प्रतिनिधिसभा सदस्य विपीनकुमार आचार्य, प्रतिनिधिसभा सदस्य दीपक बोहरा तथा स्वकीय सचिव प्रदीप आचार्य सहभागी रहेका छन्।

रास्वपाले भ्रमणले नेपाल–भारत सम्बन्ध तथा दुई देशका राजनीतिक शक्तिबीचको संवादलाई थप सुदृढ बनाउन सहयोग पुग्ने विश्वास व्यक्त गरेको छ।

काठमाडौँ, १९ जेठ । राष्ट्रिय स्वतन्त्र पार्टी (रास्वपा) का सभापति रवि लामिछाने भारत भ्रमणका क्रममा नयाँदिल्ली पुगेका छन्। भारतीय जनता पार्टी (भाजपा) को निमन्त्रणामा भारत पुगेका लामिछानेले बुधबार भारतीय प्रधानमन्त्री नरेन्द्र मोदीसँग भेटवार्ता गर्ने कार्यक्रम तय भएको छ।

स्रोतका अनुसार प्रधानमन्त्री मोदीसँग भेट्ने दिन निश्चित भए पनि भेटवार्ता हुने स्थान र समय भने अन्तिम रूपमा तय भइसकेको छैन। भ्रमणका क्रममा लामिछानेले भारतका राष्ट्रिय सुरक्षा सल्लाहकार अजित डोभल लगायत अन्य उच्च अधिकारीसँग पनि भेट गर्ने कार्यक्रम रहेको छ।

सभापति लामिछाने मंगलबार बिहान भारतीय जनता पार्टीको मुख्यालय जाने कार्यक्रम छ। त्यहाँ उनको स्वागतसहित विभिन्न राजनीतिक तथा कूटनीतिक विषयमा छलफल हुने बताइएको छ। भाजपा मुख्यालयमा पार्टीका नेता नितिन नवीन सहित अन्य वरिष्ठ अधिकारीहरूसँग पनि भेटवार्ता हुने जनाइएको छ।

यसै क्रममा भारतका विदेशमन्त्री एस. जयशंकरसँग पनि लामिछानेको भेटवार्ता हुने तयारी छ। भारतस्थित अन्तर्राष्ट्रिय नेपाली मञ्चले जेठ २१ गते लामिछानेलाई अभिनन्दन गर्ने कार्यक्रम तय गरेको छ।

भ्रमणका क्रममा लामिछानेले भारतको अयोध्यास्थित राम मन्दिरको दर्शन गर्ने कार्यक्रम पनि रहेको बताइएको छ।

गत निर्वाचनपछि सबैभन्दा ठूलो दलका रूपमा उदाएको रास्वपाको तर्फबाट यो पहिलो उच्चस्तरीय विदेश भ्रमण मानिएको छ। पाँचदिने भारत भ्रमण पूरा गरी सभापति लामिछाने शुक्रबार स्वदेश फर्किने कार्यक्रम रहेको छ।