एजेन्सी। अमेरिकाको क्यालिफोर्निया राज्य अन्तर्गत लस एन्जल्समा आप्रवासीविरुद्ध गरिएको सरकारी कारबाहीका कारण सुरू भएको विरोध प्रदर्शन हिंसात्मक झडपमा परिणत भएको छ।

राष्ट्रपति डोनाल्ड ट्रम्पको निर्देशनमा, राज्य सरकारको सहमतिबिनै संघीय सुरक्षा निकायहरूले आप्रवासीको खोजी र नियन्त्रणका लागि छापा मार्न थालेपछि हजारौँ प्रदर्शनकारी सडकमा उत्रिएका हुन्। यसै क्रममा ट्रम्पले २,००० भन्दा बढी राष्ट्रिय सुरक्षा गार्ड परिचालन गर्न आदेश दिएका थिए।

यस कदमको क्यालिफोर्नियाका गभर्नर ग्याभिन न्यूसम लगायत स्थानीय जनप्रतिनिधिहरूले कडा विरोध जनाएका छन्। उनीहरूले संघीय सरकारको हस्तक्षेपलाई राज्यको अधिकारमाथिको उल्लङ्घन तथा असंवैधानिक कार्यको रूपमा लिएका छन्। यसले राज्य र संघीय सरकारबीच कानुनी तथा संवैधानिक टकराव चर्किएको छ।

एजेन्सीहरूका अनुसार, संघ सरकारको निर्णयविरुद्ध लस एन्जल्समा भएको प्रदर्शनमा दर्जनौँ व्यक्ति घाइते भएका छन् भने ५० भन्दा बढी प्रदर्शनकारीहरू गिरफ्तार गरिएको जनाइएको छ।

राष्ट्रपति ट्रम्पले भने आफ्नो निर्णय संघीय कानूनको पालना गराउन बाध्य भएर गरिएको बताएका छन्। तर, क्यालिफोर्निया राज्य सरकारले संघीय कदमलाई प्रजातान्त्रिक मूल्य र संघीय संरचनाविरुद्धको आक्रमणको रूपमा व्याख्या गरेको छ।