- ३१ आश्विन २०८३, शनिबार / Oct 17, 2026
काठमाडौं, ३१ असोज । वाणिज्य, आपूर्ति तथा उपभोक्ता संरक्षण विभागले बडादसैँलाई लक्षित गरी सञ्चालन गर्दै आएको बजार अनुगमन अष्टमीसम्म जारी राख्ने भएको छ । महानवमीदेखि टीकाको भोलिपल्टसम्म भने बजार अनुगमन पूर्ण रूपमा स्थगित गरिने विभागले जनाएको छ ।
विभागका सूचना अधिकारी अनिल किराँतीका अनुसार दसैँको बिदा सुरु भएसँगै बजार अनुगमनमा खटिने टोलीको सङ्ख्या घटाइएको छ । सामान्य अवस्थामा काठमाडौं उपत्यकामा दैनिक १० वटा टोली परिचालन हुँदै आएका थिए ।
तर, फूलपाती र अष्टमीका दिन आलोपालो गरी दैनिक दुईवटा टोलीले मात्रै बजार अनुगमन गर्नेछन् ।“कर्मचारीहरू बिदामा घर जाने भएकाले फूलपाती र अष्टमीमा दुई–दुईवटा टोली मात्रै परिचालन हुन्छन्”, सूचना अधिकारी किराँतीले भने, “महानवमीदेखि टीकाको भोलिपल्टसम्म भने अनुगमन टोली खटिने छैन ।”
दसैँको बिदा सकिएपछि विभागले बजार अनुगमनलाई पुनः नियमित रूपमा सञ्चालन गर्ने जनाएको छ ।
