काठमाडौँ, २४ असाेज । सरकारले त्रिभुवन विश्वविद्यालयको जग्गा तथा अचल सम्पत्ति खोजबिन समितिले नेपाल सरकारलाई पेश गरेको प्रतिवेदन सार्वजनिक गर्ने भएको छ।

शिक्षा, विज्ञान तथा प्रविधिमन्त्री महावीर पुनले मन्त्रालयमा भएको छलफलपछि उक्त प्रतिवेदन सार्वजनिक गर्ने निर्णय भएको जानकारी सामाजिक सञ्जालमार्फत दिएका हुन्।

त्यस्तै, नेपालमा रहेका क्यान्सर अस्पतालहरूमा बिरामीको उपचारका लागि प्रयोग हुने रेडियोधर्मी औषधिहरूको उत्पादन नेपालमै गर्न आणविक अनुसन्धान केन्द्र औषधि उपचारका लागि मात्र खोल्ने निर्णय पनि सरकारले गरेको छ।

साथै, प्राविधिक शिक्षा तथा व्यावसायिक तालिम परिषद् (CTEVT) को पुनर्संरचना गरी सक्षम जनशक्ति उत्पादन गर्न सक्ने संस्थाको रूपमा रूपान्तरण गर्न कार्यदल तुरुन्त गठन गर्ने निर्णय पनि भएको उनले बताएका छन्।

त्यसैगरी, नेपाल विज्ञान तथा प्रविधि प्रतिष्ठान (NAST) मा वैज्ञानिक अनुसन्धान र नवप्रवर्तनलाई उपलब्धिमूलक बनाउन, प्रतिभाशाली नेपालीहरूलाई आकर्षित गर्न र संस्थालाई प्रभावकारी बनाउने उद्देश्यले सुधार र पुनर्संरचनाका लागि कार्यदल गठन गर्ने निर्णय गरिएको छ।

यसैगरी, संस्कृत विश्वविद्यालय मा रिक्त रहेको सेवा आयोगका पदाधिकारीहरूलाई नियमानुसार छिट्टै नियुक्त गर्ने निर्णय पनि भएको मन्त्री पुनले बताएका छन्।