काठमाण्डौ,  १३ पुष । अघिल्लो चुनावको तुलनामा आउँदो प्रतिनिधिसभा चुनावमा सहभागी हुने मतदाताको सङ्ख्या ९ लाख १५ हजार ११९ जनाले बढेको छ । यसमध्ये ५ लाख २२ हजार ५ सय ५२ पुरुष र ३ लाख ९२ हजार ५ सय ५२ महिला मतदाता रहेका छन् ।

प्रतिनिधिसभा सदस्य चुनावमा जम्मा १ करोड ८९ लाख ३ हजार ६८९ जना मतदाताले भाग लिने भएका छन् । निर्वाचन आयोगले अन्तिम नामावली प्रकाशन गर्दै ९६ लाख ६३ हजार ३ सय ५८ पुरुष, ९२ लाख ४० हजार १ सय ३१ महिला र अन्य दुई सय मतदाता चुनावमा सहभागी हुने जानकारी दिएको छ ।

मतदाताले आफ्नो नामावलीमा नाम हेर्न सक्नेगरी अन्तिम मतदाता नामावली आयोगको वेबसाइटमा प्रकाशित गरिएको छ । आयोगका अनुसार आउँदो फागुन २० गतेसम्म १८ वर्ष उमेर पूरा हुने नागरिकको विवरण समेत अद्यावधिक गरी अन्तिम नामावली तयार गरिएको छ ।

यस अन्तिम नामावलीमा समावेश भएका मतदातालाई मतदान गर्नका लागि देशभर १०,९६७ मतदातास्थलमा २३,११२ मतदान केन्द्र निर्धारण गरिएको छ । यो संख्या २०७९ सालको कुल मतदानस्थलको तुलनामा ७५ वटा बढी हो भने कुल मतदान केन्द्रको संख्या ८८५ ले बढेको छ ।