- १ आश्विन २०८३, बिहीबार / Sep 17, 2026
काठमाडौं, ७ भदाै । शिक्षा विधेयकको मस्यौदा तयार पार्नुअघि शिक्षा मन्त्रालयले सातै प्रदेशबाट प्राप्त सुझावको समीक्षा गर्ने भएको छ। शिक्षामन्त्री सस्मित पोखरेलसहित शिक्षा क्षेत्रका सरोकारवालाको सहभागितामा आज नेपाल प्रज्ञा–प्रतिष्ठानमा शिक्षा संवादको समीक्षा कार्यक्रम आयोजना गरिएको छ।
विद्यालय शिक्षा विधेयक निर्माण प्रक्रियामा सरोकारवालाको प्रत्यक्ष सहभागिता सुनिश्चित गर्ने उद्देश्यले मन्त्रालयले यसअघि सातै प्रदेशमा शिक्षा संवाद आयोजना गरेको थियो।
सातै प्रदेशबाट प्राप्त सुझाव, प्रमुख विषय तथा निष्कर्षलाई एकीकृत रूपमा प्रस्तुत गरिनेछ। प्रदेशस्तरीय छलफलबाट आएका सुझावका आधारमा विद्यालय शिक्षा विधेयकको मस्यौदामा समेटिनुपर्ने प्राथमिक विषयबारे थप छलफल गरिने मन्त्रालयले जनाएको छ।
प्रदेशस्तरीय शिक्षा संवादमा शिक्षकको व्यावसायिक विकास, विद्यालय व्यवस्थापन, विद्यार्थीको सिकाइ उपलब्धि, पाठ्यक्रम तथा मूल्याङ्कन प्रणाली, विद्यालयको गुणस्तर सुधार तथा सङ्घ, प्रदेश र स्थानीय तहबीचको शैक्षिक जिम्मेवारी प्रमुख विषयका रूपमा उठेका थिए।
