रोल्पा, २८ साउन। रोल्पाको थवाङ गाउँपालिका–५ कोटलबारा गाउँमा पहिरोमा परी मृत्यु भएका चार जनाको सनाखत भएको छ।जिल्ला प्रहरी कार्यालयका प्रहरी निरीक्षक कृष्ण श्रेष्ठका अनुसार मृत्यु हुनेमा थवाङ गाउँपालिका–५ की १८ वर्षीया शान्ती पुन मगर, ६० वर्षीय कमलबहादुर पुन मगर, ७५ वर्षीय दलबहादुर पुन मगर र ८० वर्षीया मनखना पुन मगर रहेका छन्।

पहिरोमा परी घाइते भएका थवाङ गाउँपालिका–५ का २२ वर्षीय हिमाल पुन मगर र २५ वर्षीय सञ्जय घर्ती मगरलाई थप उपचारका लागि लुम्बिनी प्रादेशिक अस्पताल बुटवल लगिएको छ।

प्रहरी निरीक्षक श्रेष्ठका अनुसार पहिरोमा परी नौ जना बेपत्ता छन्। बेपत्ता हुनेमा ३८ वर्षीया जुनकुमारी पुन मगर, नौ वर्षीय अशिम पुन मगर, पाँच वर्षीय अशोक पुन मगर, ८० वर्षीय अजम्बर पुन मगर, ८० वर्षीय बलबहादुर पुन मगर, ६१ वर्षीय लिलबहादुर पुन मगर, ६६ वर्षीया मनी पुन मगर, ८५ वर्षीया हस्तकला रोका मगर र ३४ वर्षीय महेन्द्र घर्ती रहेका छन्।

बेपत्ताको खोजी तथा उद्धारका लागि नेपाली सेना, सशस्त्र प्रहरी बल, नेपाल प्रहरी र स्थानीयवासी परिचालन भएका छन्। थवाङ गाउँपालिका–५ कोटलबारा गाउँमा बुधबार राति पहिरो गएको थियो। पहिरोपछि बेपत्ताको खोजी तथा उद्धार कार्यलाई तीव्र पारिएको प्रहरीले जनाएको छ।

मुख्य बुँदा

अण्डमान सागरमा शरणार्थी बोकेको डुङ्गा पल्टिँदा करिब २५० जना बेपत्ता भएका छन् ।

डुङ्गामा रोहिङ्ग्या शरणार्थी तथा बङ्गलादेशी नागरिक रहेका थिए ।

तीव्र हावा र अत्यधिक भारका कारण दुर्घटना भएको बताइएको छ ।

डुङ्गा बङ्गलादेशबाट मलेसियातर्फ जाँदै थियो ।

केही व्यक्तिको मात्र उद्धार गरिएको छ, उद्धार कार्य जारी छ ।

केहीलाई मानव तस्करीको आशङ्कामा नियन्त्रणमा लिइएको छ ।

काठमाडौँ, २ बैशाख । अण्डमान सागरमा शरणार्थी बोकेको डुङ्गा पल्टिँदा करिब २५० जना रोहिङ्ग्या शरणार्थी तथा बङ्गलादेशी नागरिक बेपत्ता भएका छन् ।

अण्डमान सागर म्यानमार, थाइल्यान्ड र मलेसिया प्रायद्वीपको पश्चिमी किनारसँग जोडिएको क्षेत्र हो । डुङ्गामा पुरुष, महिला तथा बालबालिका समेत सवार रहेको र तीव्र हावा तथा अत्यधिक भारका कारण डुङ्गा डुबेको राष्ट्रसंघलाई उद्धृत गर्दै अल जजिराले जनाएको छ ।

डुङ्गा दक्षिण बङ्गलादेशबाट मलेसियातर्फ जाँदै थियो । सन् २०१७ मा म्यानमारको सेनाद्वारा गरिएको दमन र जातीय सफायापछि ७ लाख ३० हजारभन्दा बढी रोहिङ्ग्या नागरिक आफ्नो घर छोड्न बाध्य भई शरणार्थी शिविरमा बसिरहेका छन् ।

तीमध्ये हजारौँले हरेक वर्ष जोखिमपूर्ण समुद्री यात्रा गर्दै अन्य देश पुग्ने प्रयास गर्ने गरेका छन् । यस घटनामा बङ्गलादेश कोस्ट गार्डले ६ दिनअघि अप्रिल ९ तारिखमा नौ जनालाई उद्धार गरेको जनाएको छ । उद्धार गरिएकामध्ये एक महिलासहित केहीलाई मानव तस्करीमा संलग्न भएको आशङ्कामा नियन्त्रणमा लिइएको समाचारमा उल्लेख छ ।

एक जीवित उद्धार भएका व्यक्तिले चार दिनसम्म समुद्रमा यात्रा गरेपछि डुङ्गा पल्टिएको र आफूहरू ३६ घण्टासम्म समुद्रमा तैरिएर ज्यान जोगाउन सफल भएको बताएका छन् । उनका अनुसार अत्यधिक भीड र सास फेर्न कठिन भएपछि २५ देखि ३० जनाको मृत्यु यात्रा क्रममा नै भएको थियो । डुङ्गा दुर्घटनाको घटना ढिलो गरी सार्वजनिक भएको हो ।

एजेन्सी, मंसिर १८ । श्रीलङ्कामा आएको विनाशकारी चक्रवात र मौसमी विपद्को कारण मृत्यु हुनेको संख्या ४७९ पुगेको श्रीलङ्काको विपद् व्यवस्थापन केन्द्र (DMC) ले जानकारी दिएको छ ।

अझै ३५० जना बेपत्ता रहेका छन् भने राष्ट्रव्यापी रूपमा ४,५५,४०५ परिवारका १६ लाखभन्दा बढी मानिस प्रभावित भएका छन्। डिएमसीका अनुसार विपत्तिले १,२८९ घर पूर्ण रूपले ध्वस्त बनाएको छ भने ४४,५०० भन्दा बढी घरमा आंशिक क्षति पुगेको छ।

साथै कृषि सेवा विभाग अन्तर्गतका १,७७७ ट्याङ्की, ४८३ बाँध, १,९३६ नहर, र ३२८ सडक क्षतिग्रस्त भएको विवरण सार्वजनिक गरिएको छ। यसबीच, चिनियाँ नेतृत्वले श्रीलङ्कामा आएको विनाशकारी बाढीप्रति शोक व्यक्त गर्दै आवश्यक सहयोग प्रदान गर्ने घोषणा गरेको छ।

श्रीलङ्काको अनुरोधमा चीनले नगद अनुदान, लाइफ ज्याकेट, टेन्ट लगायतका आपतकालीन सामग्री पठाउने निर्णय गरेको हो। त्यस्तै, एसियाली विकास बैंक (ADB) ले श्रीलङ्कालाई आपतकालीन अवस्थामा सहयोग गर्न ३० लाख अमेरिकी डलरको अनुदान स्वीकृत गरेको छ।

हङकङ, एजेन्सी । हङकङको उत्तर ताई पो जिल्लामा ३५ तले गगनचुम्बी आवासीय भवनमा भीषण आगलागी भएको छ । अधिकारीहरूले जनाए अनुसार यसमा परी मृत्यु हुनेको संख्या ४४ पुगेको छ भने हालसम्म २७९ जना बेपत्ता रहेका छन् ।

आगो नियन्त्रणमा आउन धेरै समय लागेको र घटनास्थलमा ८०० भन्दा बढी अग्नि नियन्त्रक खटाइएको छ । भवनको भित्री संरचना बाँस र पोलिस्टिरिन फोम जस्ता ज्वलनशील सामग्रीबाट बनेको भएकोले आगो अत्यन्त छिटो फैलिएको अनुमान गरिएको छ । कैयौँ व्यक्तिहरूलाई घाइते अवस्थामा उद्धार गरिएको छ ।

आगलागीको कारण खुल्न बाँकी छ । आगलागीपछि ठूलो मानवीय क्षति भएपछि भवन निर्माण कम्पनीका तीन कर्मचारीलाई पक्राउ गरिएको छ । हङकङमा आवासीय भवन निर्माण गर्दा अत्यधिक मात्रामा बाँसको प्रयोग हुने गरेको बताइएको छ ।

घटनास्थलबाट सार्वजनिक भएका भिडियोमा कालो धुवाँको विशाल मुस्लो आकाशतर्फ उडिरहेको देख्न सकिन्छ । अधिकारीहरूले उद्धार कार्य जारी राखेका छन् र बेपत्ता व्यक्तिहरूको खोजी जारी छ ।

 

 

एजेन्सी, २० कार्तिक । फिलिपिन्समा आएको शक्तिशाली टाइफुन कल्मेगी आँधीका कारण अहिलेसम्म कम्तीमा एक सय जनाको ज्यान गएको छ भने हजारौं मानिस घरबारविहीन बनेका छन्।

बीबीसीका अनुसार, मुख्यगरी सेबु प्रान्तमा ठूलो वर्षा र बाढीका कारण ४९ जनाको ज्यान गएको र ७५ जना अझै बेपत्ता छन्। टाइफुनले मंगलवार बिहान प्रवेश गर्दै जस्तोसुकै क्षेत्रमा १३० किलोमिटर प्रतिघण्टा हावाको गति र मुसलधारे वर्षा गराएको थियो। घरहरूमा पानी पसेपछि मानिसहरू छानामा आश्रय लिन बाध्य भएका थिए।

उद्धारका क्रममा पठाइएको सैन्य हेलिकप्टर दुर्घटना हुँदा चालक दलका ६ जनाको ज्यान गएको छ। फिलिपिन्सको राष्ट्रिय विपद् व्यवस्थापन एजेन्सीका अनुसार हालसम्म चार लाखभन्दा बढी मानिस विस्थापित भएका छन्।

मुख्य बुँदा 

अविरल वर्षाका कारण इलाममा बाढी, पहिरो र डुबानले ठूलो जनधनको क्षति।

पछिल्ला दुई दिनमा १८ जनाको मृत्यु, सबै इलाम जिल्लाकै।

सूर्योदय नगरपालिका, माङसेबुङ, देउमाई, फाकफोकथुम र इलाम नगरपालिका सबैभन्दा बढी प्रभावित।

प्रहरीका अनुसार अझै केही व्यक्ति बेपत्ता — खोजी तथा उद्धार कार्य जारी।

घोसगाउँमा मात्रै ६ जनाको मृत्यु, मानेभञ्ज्याङमा ५ जनाको मृत्यु पुष्टि।

इलामका धेरै भागमा सडक, पुल र घरहरूमा क्षति, आवागमन अवरुद्ध।

सुरक्षाकर्मी र स्थानीय टोली उद्धारमा सक्रिय, राहत वितरणको तयारी सुरु।

इलाम, १९ असोज । पूर्वी नेपालको इलाम जिल्लामा लगातार परिरहेको वर्षाले ठूलो मानवीय क्षति पुर्‍याएको छ। पछिल्ला दुई दिन (हिजो र आज) मात्र बाढी, पहिरो र डुबानका कारण १८ जनाले ज्यान गुमाएका छन्।

कोशी प्रदेश प्रहरी कार्यालयका प्रवक्ता डीएसपी दीपक पोखरेलका अनुसार सबै मृतक इलाम जिल्लाकै रहेका छन्। उनले भने, “पछिल्ला दुई दिनको अवधिमा विभिन्न स्थानमा पहिरो र बाढीले १८ जनाको मृत्यु भएको पुष्टि भएको छ, खोजी र उद्धार कार्य जारी छ।”

प्रहरीको विवरणअनुसार सूर्योदय नगरपालिका–१, मानेभञ्ज्याङमा ५ जनाको मृत्यु, माङसेबुङ गाउँपालिका–१, पाटिगाउँमा ३ जनाको मृत्यु, देउमाई नगरपालिका–५, धारेमा १ जनाको मृत्यु र धुसुनेमा २ जनाको मृत्यु, फाकफोकथुम गाउँपालिका–३, रातमाटेमा १ जनाको मृत्यु, इलाम नगरपालिका–५, घोसगाउँमा ६ जनाको मृत्यु भएको छ।

यससँगै इलाममा बाढी–पहिरोका कारण ज्यान गुमाउनेको संख्या १८ पुगेको पुष्टि भएको छ। प्रहरीका अनुसार अझै केही व्यक्ति बेपत्ता छन् भने क्षतिको पूर्ण विवरण संकलन भइरहेको छ।

अविरल वर्षाका कारण इलामका विभिन्न क्षेत्रमा सडक, पुल र घरहरूमा क्षति पुगेको छ। स्थानीय प्रशासन, प्रहरी र सशस्त्र प्रहरीको टोली उद्धार तथा राहत कार्यमा सक्रिय रहेको इलामका प्रमुख जिल्ला अधिकारीले बताएका छन्।

इलाम, १९ असोज ।पूर्वी नेपालको इलाममा अविरल वर्षापछि आएको बाढी र पहिरोले ठूलो जनधनको क्षति पुर्‍याएको छ। जिल्लाको विभिन्न ठाउँमा पहिरो र बाढीका कारण अहिलेसम्म २ जनाको मृत्यु भएको र १५ जनाभन्दा बढी बेपत्ता भएको प्रारम्भिक जानकारी प्राप्त भएको छ।

इलाम नगरपालिका–६ घोसमा डम्बरबहादुर पाख्रिनको घर पहिरोले पुर्दा दुई जनाको मृत्यु भएको इलाम प्रहरी प्रमुख प्रहरी उपरीक्षक एक नारायण कोइरालाले जानकारी दिए। उक्त घरमा रहेका तीन जना अझै बेपत्ता छन् भने दुई जना घाइतेलाई उपचारका लागि अस्पताल लगिएको छ। उद्धार टोली घटनास्थलमा खटिएको र खोजी कार्य जारी रहेको प्रहरीले जनाएको छ।

त्यस्तै, माइजोगमाई गाउँपालिका–६ बर्मालाल सोग्मीको पाँच सदस्यीय परिवार पनि राति खसेको पहिरोमा परेर बेपत्ता भएको छ। पहिरोका कारण सम्पर्कविहीन बनेका उनीहरूको खोजी कार्य बिहानैदेखि सुरु गरिएको छ। इलामको मांसेबुंग गाउँपालिका–१ मा आएको बाढीले एउटा पुल समेत बगाएको छ। सो क्षेत्रमा पनि पहिरोले पुर्दा ५ जना बेपत्ता भएको प्रारम्भिक जानकारी जिल्ला प्रशासन कार्यालय इलामले दिएको छ।

त्यस्तै, शन्दकपुर गाउँपालिका–३ सुलुबुङ निवासी कुमार सेढाईकी आमा र छोरी पनि पहिरोमा परेर बेपत्ता भएका छन्। प्रमुख जिल्ला अधिकारी सुनिता नेपालका अनुसार मृतक र बेपत्ताको आधिकारिक विवरण संकलन भइरहेको छ।

बिहानबाट वर्षा रोकिएपछि उद्धार कार्य तीव्र पारिएको र स्थानीय प्रशासन, प्रहरी, सशस्त्र प्रहरी र स्थानीय बासिन्दाहरूले संयुक्त रूपमा खोजी र उद्धार कार्य गरिरहेको इलाम प्रहरीका प्रमुख कोइरालाले बताएका छन्।

एजेन्सी, १८ भाद्र । इन्डोनेसियामा हिंसात्मक विरोध प्रदर्शनपछि कम्तीमा २० जना बेपत्ता भएका छन्। कानून निर्माताहरूको सुविधाको विषयलाई लिएर प्रहरी विरुद्ध आक्रोश पोखिँदै भएको आन्दोलनमा उनीहरू बेपत्ता भएको जनाइएको हो। गत हप्ता अर्धसैनिक प्रहरीले एक युवा डेलिभरी ड्राइभरको हत्या गरेको भिडियो सार्वजनिक भएपछि दक्षिणपूर्वी एसियाको सबैभन्दा ठूलो अर्थतन्त्र इन्डोनेसियामा विरोध प्रदर्शन भड्किएको थियो। यस क्रममा कम्तीमा छ जनाको मृत्यु भएको थियो।

“सेप्टेम्बर १ सम्म २३ जना बेपत्ता भएको रिपोर्ट आएको थियो। खोजी र प्रमाणीकरणपछि २० जनाको अवस्था अझै अज्ञात छ”, बेपत्ता र हिंसाका पीडितका लागि आयोग (कन्ट्रास) ले विज्ञप्तिमा उल्लेख गरेको छ। जाभा टापुको बान्दुङ र देपोक सहरका साथै राजधानी क्षेत्रअन्तर्गत मध्य, पूर्वी र उत्तरी जकार्तामा उनीहरू बेपत्ता भएको आयोगले जनाएको छ। एक घटना भने ‘अज्ञात स्थान’ मा भएको बताइएको छ।

जकार्ता मेट्रोपोलिटन प्रहरी प्रमुख एसेप एडी सुहेरीका अनुसार गस्ट २५ यता राजधानीमा भएको प्रदर्शनमा एक हजार दुई सय ४० जना पक्राउ परेका छन्। देशभर फैलिएको असन्तुष्टिपछि राष्ट्रपति प्रबोवो सुबिआन्तो सांसदका सुविधाबारे पुनर्विचार गर्न बाध्य भएका छन्। उनी सत्तामा आएपछि यसअघि भएका सबैभन्दा ठूलो विरोध प्रदर्शन यिनै हुन्।

यसैबीच संयुक्त राष्ट्रसङ्घले पनि प्रदर्शनका क्रममा ‘असमान बल प्रयोग’ भएको आरोपमा छानबिन गर्न आग्रह गरेको छ। सोमबार राजधानी जकार्ताभर सेना परिचालन गरिएको थियो भने अन्य सहरहरूमा पनि झडप भएको रिपोर्ट आएको छ। बान्दुङमा प्रदर्शनकारीहरूले प्रान्तीय परिषद् भवनतर्फ मोलोटोभ ककटेल फ्याँकेपछि प्रहरीले अश्रुग्यास प्रहार गरेको थियो।

सामाजिक सञ्जालमा प्रहरीमाथि क्याम्पसमा गोली प्रहार गरेको आरोप लगाइएको भए पनि प्रहरी र विश्वविद्यालय प्रशासनले त्यसलाई अस्वीकार गरेका छन्। सुमात्रा, बोर्नियो, जाभा र सुलावेसीका विभिन्न सहरमा समेत प्रदर्शन तीव्र भएको छ। सुलावेसीकै गोरोन्टालोमा झडप हुँदा प्रहरीले अश्रुग्यास र पानीको फोहोरा प्रयोग गरेको थियो।

टिकटकले समेत ‘सुरक्षाका कारण’ केही दिनका लागि इन्डोनेसियामा लाइभ प्रसारण सुविधा निलम्बन गरेको जनाएको छ। इन्डोनेसियामा टिकटक प्रयोगकर्ता १० करोडभन्दा बढी छन्।