एजेन्सी, २२ माघ । चीनको सरकारी स्वामित्वमा रहेको विमान निर्माता कम्पनी कोम्याक (COMAC) ले अमेरिकी बोइङ र युरोपेली एअरबसलाई चुनौती दिँदै अन्तर्राष्ट्रिय बजारमा आफ्नो उपस्थिति विस्तार गर्न थालेको छ। दुई वर्षअघि ‘सी–९१९’ विमानले सिङ्गापुरसम्म सफल उडान गरेपछि चीनबाहिरको बजारमा कोम्याकको प्रभाव बढ्दै गएको बीबीसीले जनाएको छ।

दक्षिण–पूर्वी एशियामा किफायती र इन्धन–दक्ष विमानको माग तीव्र रूपमा बढिरहेका बेला कोम्याकका विमानहरूले विभिन्न एअरलाइन्सहरूको ध्यान तानेका छन्। कम्पनीले एअरबसको ए–३२० नियो र बोइङको ७३७ म्याक्ससँग प्रत्यक्ष प्रतिस्पर्धा गर्ने गरी आफ्नो विमान डिजाइन गरिएको दाबी गरेको छ।

विश्लेषकहरूका अनुसार विमान डेलिभरीमा भइरहेको ढिलाइ र आपूर्ति शृङ्खलामा देखिएका समस्याका कारण यस क्षेत्रमा वैकल्पिक विमान निर्माताको आवश्यकता बढेको छ। अन्तर्राष्ट्रिय हवाई यातायात सङ्घ (आईएटीए) का अनुसार पुराना विमान सञ्चालन गर्नुपर्दा एअरलाइन्सहरूको खर्च बढ्दै गएको छ, जसका कारण नयाँ र किफायती विमानप्रति आकर्षण बढेको हो।

यही अवस्थालाई अवसरका रूपमा उपयोग गर्दै कोम्याक एशिया–प्रशान्त क्षेत्रका धेरै एअरलाइन्सका लागि विकल्पका रूपमा उदाइरहेको छ। कम्पनीले हालसम्म दुई सयभन्दा बढी विमान डेलिभर गरिसकेको जनाएको छ, जसमा लाओस, इन्डोनेशिया र भियतनामका एयरलाइन्सहरू पनि समावेश छन्। साथै ब्रुनाई र कम्बोडियाले पनि कोम्याकका विमान खरिद गर्ने योजना बनाइरहेका छन्।

एजेन्सी । हङकङ अन्तर्राष्ट्रिय विमानस्थलमा एक कार्गो जहाज धावनमार्गबाट चिप्लिएर समुद्रमा खस्दा दुई जनाको ज्यान गएको छ, इमिरेट्स एयरलाइन्सको उडान ईके ९७८८ को बोइङ जहाज गएराति अवतरणका क्रममा दुर्घटनामा परेको हो ।

विमान अवतरणका क्रममा धावनमार्गको दक्षिण भागमा रहेको एउटा गाडीलाई ठक्कर दिँदा दुर्घटना भएको बताइएको छ, सो क्रममा दुईजना ’ग्राउन्ड स्टाफ’ समुद्रमा खसेका थिए, उद्धारपछि अस्पताल लगिए पनि दुबै जनाको मृत्यु भएको हङकङ प्रहरीलाई उद्धृत गर्दै बीबीसीले जनाएको छ ।

जहाजमा चालक दलका चार सदस्य रहेका थिए, उनीहरू जीवितै उद्धार गरिएका र अस्पतालमा उपचाररत रहेको समाचारमा उल्लेख छ ।  दुर्घटनापछि जहाज दुई टुक्रा भएको र एउटा भाग समुद्रमा तैरिरहेको अवस्थामा भेटिएको छ ।

विमानस्थलमा आज कम्तिमा ११ वटा कार्गो जहाज अवतरण गर्ने तालिका रहेकामा सबै उडान रद्द गरिएको विमानस्थलको वेबसाइटमा जनाइएको छ ।