मेघालय, भारत । भारतको मेघालय राज्यस्थित अवैध कोइलाखानीमा भएको विष्फोटमा परेर खोटाङका तीन जना युवकको ज्यान गएको छ । पूर्वी जयन्तीया हिल्स जिल्लाको खानीमा माघ २२ गते भएको दुर्घटनामा एक जना बेपत्ता भएका छन् भने अन्य तीन जना गम्भीर घाइते भएका छन् ।

मृत्यु हुनेमा बरापोखरी गाउँपालिका–१ का २७ वर्षीय पूर्णिराम खपाङ्गी मगर, २४ वर्षीय सुरेन्द्र खपाङ्गी मगर र ३५ वर्षीय नरबहादुर खपाङ्गी मगर रहेका छन् । पूर्णिराम र सुरेन्द्र दाजुभाइ हुन्  । विष्फोटका क्रममा हलेसी तुवाचुङ नगरपालिका–५ का ५० वर्षीय रत्न राई बेपत्ता भएका छन् । खानीभित्रै विस्फोट भएकाले उनको जलेर मृत्यु भएको हुन सक्ने आशंका गरिएको छ । उनको नागरिकता र मोबाइल भने बस्ने कोठामै फेला परेको जनाइएको छ ।

घटनामा बरापोखरी गाउँपालिका–१ का कर्णबहादुर खपाङ्गी मगर, बमबहादुर खपाङ्गी मगर तथा उदयपुरका ललित लुङ्गेली मगर गम्भीर घाइते भएका छन् । उनीहरूको मेघालयस्थित स्थानीय अस्पतालमा उपचार भइरहेको छ । साथीहरूले दिएको जानकारीअनुसार विष्फोटपछि उद्धार गरिएका शवहरू आगोले जलेर चिन्नै नसकिने अवस्थामा रहेका छन् ।

रोजगारीका लागि भारत पुगेका युवाहरूको अकाल मृत्यु भएपछि खोटाङका सम्बन्धित गाउँ शोकमा डुबेका छन् । मृतकका आफन्तहरू शव लिन मेघालय पुगे पनि कानुनी प्रक्रिया र आर्थिक अभावका कारण शव नेपाल ल्याउन कठिनाइ भएको छ । घाइतेहरूको उपचार तथा मृतकका शव स्वदेश ल्याउन स्थानीय तहमा सहयोग सङ्कलन अभियानसमेत सुरु गरिएको छ ।