काठमाडौँ, १५ बैशाख । जल तथा मौसम विज्ञान विभाग अन्तर्गतको मौसम पूर्वानुमान महाशाखा ले मङ्गलबार कोशी, मधेस, गण्डकी र बागमती प्रदेशका केही स्थानमा मेघगर्जन र चट्याङसहित वर्षा हुने पूर्वानुमान गरेको छ।

मौसमविद् सरोज पुडासैनीका अनुसार आज दिउँसो लुम्बिनी, कर्णाली र सुदूरपश्चिम प्रदेशका हिमाली भूभागका थोरै स्थानमा मध्यमसम्मको वर्षा वा हिमपात हुने सम्भावना रहेको छ।

उनका अनुसार मङ्गलबार कोशी प्रदेशका हिमाली तथा पहाडी भूभाग र गण्डकी प्रदेशका पहाडी भूभागका एक–दुई स्थानमा मेघगर्जन र चट्याङसहित भारी वर्षा हुने सम्भावना रहेको छ।

यसैगरी बुधबार पनि कोशी, मधेस, बागमती र गण्डकी प्रदेशका धेरै स्थानमा मेघगर्जन र चट्याङसहित मध्यम वर्षा वा हिमपात हुन सक्ने अनुमान गरिएको छ।

त्यस्तै कोशी र मधेस प्रदेशका एक–दुई स्थान तथा बागमती र गण्डकी प्रदेशका पहाडी भूभागका केही स्थानमा भारी वर्षा हुने सम्भावना रहेकाले आवश्यक सतर्कता अपनाउन आग्रह गरिएको छ।

मुख्य बुँदा

आजदेखि भोलि बिहानसम्म चट्याङ्गसहित वर्षाको सम्भावना

लुम्बिनी र कोशीमा तीव्र हावाहुरीको पूर्वानुमान

केही स्थानमा भारी वर्षा र हिमपात सम्भावना

हावाहुरीको वेग करिब ११९ किमि/घण्टा हुन सक्ने

प्राधिकरणद्वारा सतर्कता अपनाउन आग्रह

रुख ढल्ने, संरचना क्षति र सेवा अवरुद्ध हुने जोखिम

अनावश्यक यात्रा नगर्न र सुरक्षित रहन सुझाव

काठमाडौँ, ६ फागुन । आज दिउँसोदेखि भोलि बिहानसम्म देशका विभिन्न भागमा मेघगर्जन र चट्याङ्गसहित वर्षा हुने पूर्वानुमान गरिएको छ । मौसम पूर्वानुमानअनुसार लुम्बिनी र कोशी प्रदेशका जिल्लाहरूमा तीव्र हावाहुरी चल्ने सम्भावना पनि रहेको छ ।

जल तथा मौसम विज्ञान विभागका अनुसार हाल सुदूरपश्चिम, कर्णाली, लुम्बिनी र कोशी प्रदेशमा सामान्यतया बदली रहेको छ भने सुदूरपश्चिम, कर्णाली र कोशीका केही स्थानमा मेघगर्जन तथा चट्याङ्गसहित हल्का वर्षा वा हिमपात भइरहेको छ ।

विभागका अनुसार शुक्रबार दिउँसोदेखि कर्णाली र सुदूरपश्चिम प्रदेशका पहाडी तथा हिमाली क्षेत्रमा एक–दुई स्थानमा भारी वर्षा तथा हिमपातको सम्भावना रहेको छ । त्यस्तै लुम्बिनी प्रदेशका दाङ र नेपालगञ्ज आसपासका तराई क्षेत्रमा शुक्रबारदेखि तथा शनिबार कोशी प्रदेशका विराटनगर, धनकुटा र धरान आसपासका क्षेत्रमा तीव्र हावाहुरी चल्ने अनुमान गरिएको छ, जसको वेग करिब ११९ किलोमिटर प्रतिघण्टा हुन सक्ने बताइएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले मौसम परिवर्तनसँगै आउन सक्ने जोखिमप्रति सचेत रहन आग्रह गर्दै विशेष सतर्कता अपनाउन अनुरोध गरेको छ । तीव्र हावाहुरीका कारण रुख ढल्ने, कमजोर संरचना तथा छाना उड्ने, विद्युत् तथा सञ्चार सेवा प्रभावित हुने जोखिम रहेको प्राधिकरणले जनाएको छ ।

पछिल्ला दिनहरूमा हावाहुरीका कारण जनधनको क्षति भएको उल्लेख गर्दै प्राधिकरणले जोखिमयुक्त क्षेत्रका नागरिकलाई विशेष सावधानी अपनाउन आग्रह गरेको छ । विशेष कामबिना यात्रा नगर्न, हावाहुरीका बेला घरका झ्यालढोका बन्द गर्न, आगोका स्रोत बन्द राख्न तथा सवारीसाधन सुरक्षित स्थानमा रोक्न सुझाव दिइएको छ ।

त्यस्तै, अग्ला रुख, टेलिफोन तथा बिजुलीका खम्बा र तारमुनि नबस्न, लत्रिएका बिजुलीका तार नछुन तथा विद्युतीय उपकरण प्रयोगमा सावधानी अपनाउन पनि प्राधिकरणले आग्रह गरेको छ ।

काठमाडौँ, १० कार्तिक । देशका विभिन्न भागमा गएराति वर्षा र हिमपात भएको छ। गण्डकीदेखि पश्चिमका केही ठाउँमा गएराति र बिहानदेखि काठमाडौँ उपत्यका लगायत देशका धेरै भू–भागमा वर्षा र हिमपात सक्रिय भएको मौसम पूर्वानुमान महाशाखाले जनाएको छ।

महाशाखाले सार्वजनिक गरेको तीन दिने मौसम बुलेटिन अनुसार आजभन्दा भोलि वर्षा कम हुने सम्भावना रहेको छ। आज: गण्डकी, लुम्बिनी र कर्णाली प्रदेशका केही ठाउँमा मध्यम वर्षा र हिमपात; बाँकी पहाडी–हिमाली भू–भागमा हल्का वर्षा।

भोलि: कोशी, बागमती र गण्डकी प्रदेशका उच्च पहाडी भू–भागमा हल्का वर्षा र हिमपात। पर्सि (बिहीवार): कोशी र बागमतीका उच्च हिमाली भू–भागमा ठूलो हिमपात; मधेस र बागमतीका केही भू–भागमा ठूलो वर्षा।

आज राति कोशी, बागमती, गण्डकी, लुम्बिनी र कर्णाली प्रदेशसहित बाँकी पहाडी भू–भागमा सामान्यतया बदली रहनेछ भने तराईमा आंशिक बदली रहने अनुमान गरिएको छ। मौसमविद्हरूले नागरिकहरूलाई पहाडी–हिमाली क्षेत्रमा सतर्क रहन र आवश्यक तयारी गर्न अनुरोध गरेका छन्।

मुख्य बुँदा

पछिल्लो २४ घण्टामा रौतहटमा ३५३ मिलिमिटर र पर्सामा २८८ मिलिमिटर वर्षा।

१० वटा नदीमा खतराको तह पार, बाढी र सम्भावित पहिरोका लागि साइरन बजाइएको।

अन्य जिल्लाहरूमा पनि भारी वर्षा — बारामा २१४, सिन्धुलीमा २२0, सर्लाहीमा २२३ मिलिमिटर।

ललितपुर खोकनामा बागमती, सिन्धुलीको कमला नदी, मकवानपुरको लालबकैया नदीमा खतराको संकेत।

बङ्गालको खाडीबाट आएको मनसुनी वायु सक्रिय, आगामी २४ घण्टामा धेरै ठाउँमा भारी वर्षाको सम्भावना।

विभागले सबै नागरिकलाई सतर्क रहन अनुरोध।

काठमाडौँ, १९ असाेज । जल तथा मौसम विज्ञान विभागका अनुसार पछिल्लो २४ घण्टामा देशमै सबैभन्दा बढी रौतहटमा ३५३ मिलिमिटर वर्षा भएको छ । विभागका सूचना अधिकारी दिनकर कायस्थले अहिले पनि सो क्षेत्रमा भारी वर्षा भइरहेको जानकारी दिए । उनका अनुसार पर्सामा २८८ मिलिमिटर वर्षा भएको छ । यो शनिबार राति ८स्३० बजेको अद्यावधिक विवरण हो ।

पछिल्लो २४ घण्टाको तथ्याङ्क विश्लेषण गर्दा रौतहट र त्यसआससापका जिल्लाहरूमा अन्य क्षेत्रको तुलनामा निक्कै भारी वर्षा भइरहेको हो । बारामा २१४, सिन्धुलीमा २२०, सर्लाहीमा २२३, मकवानपुरमा १६७ मिलिमिटर वर्षा भएको छ । ललितपुरमा पनि भारी वर्षा भइरहेको छ ।

ललितपुरमा पछिल्लो २४ घण्टामा १५१ मिलिमिटर वर्षा भएको छ । काठमाडौँमा १३५ मिलिमिटर र भक्तपुरमा १११ मिलिमिटर वर्षा भएको छ । चितवनमा ११५ मिलिमिटर, महोत्तरीमा ११३ मिलिमिटर, धनुषामा ११२ मिलिमिटर, रामेछापमा १०० मिलिमिटर वर्षा भएको छ ।

५० देखि १०० मिलिमिटरको बिचमा वर्षा हुने जिल्लाहरू भने दर्जनौँ रहेका छन् । विभागको बाढी पूर्वानुमान महाशाखाले अहिलेसम्म ललितपुर खोकनामा बागमती, सिन्धुलीस्थित कमला नदी, मकवानपुरको लालबकैया नदीले खतराको तह पार गरिसकेको जनाएको छ ।

रौतहट, बारा, पर्सा वर्षा मापन केन्द्रहरूमा अति भारी वर्षा भएपछि हालसम्म १० वटा केन्द्रले खतराको तह पार गरेपछि साइरन समेत बजाइएको छ । राति पनि भारी वर्षा जारी रहने भएकाले सावधानी अपनाउन विभागले सबैमा अनुरोध गरेको छ ।

अहिले बङ्गालको खाडीबाट आएको मनसुनी वायु सक्रिय रहेको जनाउँदै विभागले आज साँझदेखि आउँदो २४ घण्टामा कोशी प्रदेश, मधेस प्रदेश, बागमती प्रदेश र गण्डकी प्रदेशका पहाडी र तराई भू–भागका थोरै स्थानहरूमा तथा लुम्बिनी प्रदेशका तराई भू–भागका एक–दुई स्थानमा भारी वर्षाको सम्भावना रहेको र कोशी प्रदेश,बागमती प्रदेश, मधेस प्रदेशका एक–दुई स्थानमा धेरै भारी वर्षाको अनुमान सार्वजनिक गरेको छ । रासस

मुख्य बुँदा 

भारी वर्षाका कारण सडक दुर्घटनाको जोखिम बढेपछि ट्राफिक प्रहरीले माइकिङमार्फत सचेतना अभियान सुरु

नागढुङ्गा, साँगा, थानकोट, बालाजु, सातदोबाटोलगायत नाकाहरूमा माइकिङ र मौखिक सूचना

चालकहरूलाई राति र पानीमा एक्लै यात्रा नगर्न र सवारीको प्राविधिक परीक्षण गर्न आग्रह

आगामी तीन दिनसम्म मनसुन सक्रिय रहने पूर्वानुमान

पृथ्वी, सिद्धार्थ, बीपी र अरनिको राजमार्गलाई उच्च जोखिम क्षेत्रको रूपमा पहिचान

देशभरका राजमार्गमा गस्ती र सूचना आदानप्रदान प्रणाली सक्रिय

काठमाडौँ, १८ असाेज । लगातारको वर्षाका कारण सडक दुर्घटनाको जोखिम बढेपछि ट्राफिक प्रहरीले उपत्यकाका प्रमुख नाकाहरूमा माइकिङमार्फत सवारी चालकहरूलाई सचेत गराउन थालेको छ।

आगामी तीन दिनसम्म भारी वर्षाको सम्भावना रहेकाले विशेष सावधानी आवश्यक भएको बताउँदै ट्राफिक प्रहरीले सडक सुरक्षामा उच्च सतर्कता अपनाएको जनाएको छ। काठमाडौँ उपत्यका ट्राफिक प्रहरी प्रमुख एसएसपी नवराज अधिकारीका अनुसार, “हालैको मौसम पूर्वानुमानअनुसार तीन दिनसम्म मनसुन सक्रिय रहने देखिएकाले यस्तो समयमा सवारी सञ्चालनमा जोखिम रहन्छ। त्यसैले चालकहरूलाई सचेत गराउनका लागि उपत्यकाका प्रमुख नाका र व्यस्त स्थानहरूमा माइकिङ सुरु गरिएको हो।”

विशेषगरी उपत्यकाबाट बाहिरिने नागढुङ्गा, साँगा, थानकोट, बालाजु, सातदोबाटो लगायतका स्थानहरूमा गएरातिदेखि नै ट्राफिक प्रहरी परिचालित गरी माइकिङ भइरहेको छ। ट्राफिक प्रहरीले चालकहरूलाई राति वा वर्षाको समयमा एक्लै यात्रा नगर्न, सकेसम्म समूहमा यात्रा गर्न, र सवारीसाधनको ब्रेक, टायर, लाइट आदि प्राविधिक परीक्षण नियमित गर्न आग्रह गरेको छ।

पृथ्वी, सिद्धार्थ, बीपी र अरनिको राजमार्ग जस्ता पहाडी तथा पहिरो जोखिमयुक्त मार्गहरूमा यात्राको क्रममा विशेष सतर्कता अपनाउन पनि अपिल गरिएको छ। वर्षातका समयमा पहिरो, सडक कटान र सडकमा पानी जम्दा सडक अवरुद्ध हुने, सवारीसाधन बिग्रने वा दुर्घटनाको सम्भावना बढी हुने भएकाले, ट्राफिक प्रहरीले यसपालि सुरुआतदेखि नै उच्च सतर्कता अपनाएको जनाएको छ।

ट्राफिक प्रहरीले देशभरका मुख्य सडक र राजमार्गमा नियमित गस्ती, ट्राफिक पोस्टमार्फत सूचना आदानप्रदान, र विपद् अवस्थामा तत्काल उद्धार कार्यका लागि तयारी अवस्थामा टोलीहरू परिचालन गरेको छ। यातायात सम्बन्धी यथासमय जानकारी पुगोस् भनेर ट्राफिक प्रहरीले फेसबुक, एक्स (ट्विटर) र विभागीय वेबसाइटमार्फत मौसम अपडेट, सडक स्थिति, आकस्मिक सडक बन्द सूचनाहरू नियमित रूपमा प्रकाशित गर्दै आएको छ।

उपत्यका ट्राफिक प्रहरी प्रवक्ता एसपी नरेशराज सुवेदीका अनुसार, “सावधानी अपनाऔँ, दुर्घटनाबाट बचौँ” भन्ने नारालाई व्यवहारमा उतार्दै सुरक्षित यात्रा सुनिश्चित गर्न सबैको सहकार्य आवश्यक छ।”

मुख्य बुँदा 

राष्ट्रिय विपद् जोखिम न्यूनीकरण तथा व्यवस्थापन प्राधिकरणको निर्णय

आगामी तीन दिन (असोज १८, १९ र २०) लामो दूरीका यातायात बन्द

भारीदेखि अति भारी वर्षा हुने पूर्वानुमानका कारण निर्णय

बाढी, पहिरो र डुबान जोखिम न्यूनीकरणका उद्देश्यले

अत्यावश्यक सवारीसाधनबाहेक सबै आवागमन रोक्न निर्देशन

प्रमुख जिल्ला अधिकारी र सुरक्षा निकायलाई अनुगमन र निगरानी आदेश

काठमाडौँ, १८ असाेज । राष्ट्रिय विपद् जोखिम न्यूनीकरण तथा व्यवस्थापन प्राधिकरणले आगामी तीन दिनका लागि लामो दूरीका यातायात बन्द गर्ने निर्णय गरेको छ।

जल तथा मौसम विज्ञान विभागको पूर्वानुमान अनुसार आगामी तीन दिनसम्म देशभर भारीदेखि अति भारी वर्षा हुने सम्भावना रहेकाले यो निर्णय गरिएको प्राधिकरणले जनाएको हो।

प्राधिकरणद्वारा जारी सूचनामा भनिएको छ, “भारी वर्षा र अति भारी वर्षाका कारण आउन सक्ने बाढी, पहिरो र डुबान जोखिम न्यूनीकरणका लागि, कोशी, मधेस, बागमती, गण्डकी र लुम्बिनी प्रदेशका सबै जिल्लाबाट चल्ने लामो दूरीका र काठमाडौँ उपत्यका भित्रिने तथा बाहिरिने सवारीसाधनको आवागमन मिति २०८२ असोज १८, १९ र २० गतेका लागि बन्द गरिन्छ।”

प्राधिकरणले अत्यावश्यक सेवाबाहेकका कुनै पनि सवारीसाधन नचलाउन आग्रह गरेको छ। साथै, सम्बन्धित जिल्लाका प्रमुख जिल्ला अधिकारी र सुरक्षा निकायलाई सवारीसाधन आवतजावत पूर्णरूपमा बन्द गर्न तथा त्यसको निरन्तर अनुगमन र निगरानी गर्न निर्देशन दिएको छ।

विपद् जोखिम न्यूनीकरण प्राधिकरणले नागरिकहरूलाई मौसम सुधार नहुँदासम्म अनावश्यक यात्रा नगर्न र सतर्क रहन पनि अपिल गरेको छ।

काठमाडौँ, १८ असाेज । शुक्रवार बेलुकीदेखि परेको पानीका कारण काठमाडौँ उपत्यकाको जनजीवन अस्तव्यस्त बनेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार आज बिहानदेखि वर्षाको मात्रा अझ बढेको छ।

अहिले पछिल्लो एक घण्टामै काठमाडौँमा ६ मिलिमिटर, ललितपुरमा ९.८ मिलिमिटर र भक्तपुरमा ५ मिलिमिटर वर्षा भएको विभागले जनाएको छ। लगातारको वर्षाले सडकमा पानी जमेको, ट्राफिक प्रभावित र यात्रुहरूलाई आवतजावतमा समस्या भएको छ।

उपत्यकासँगै तराईका विभिन्न स्थानमा पनि वर्षा भइरहेको विभागले जानकारी दिएको छ। पछिल्लो एक घण्टामा पर्सामा १० मिलिमिटर र रौतहटमा १०.६ मिलिमिटर वर्षा भएको छ भने महोत्तरी र धनुषासम्म निरन्तर वर्षा भइरहेको उल्लेख गरिएको छ।

पछिल्लो १२ घण्टामा भने सबैभन्दा बढी वर्षा कैलालीको गर्भा क्षेत्रमा ८३.२ मिलिमिटर रेकर्ड भएको विभागले जनाएको छ। त्यसैगरी १२ घण्टाको अवधिमा पर्सामा ४० मिलिमिटर र बारामा २८ मिलिमिटर वर्षा भएको छ।

जल तथा मौसम विज्ञान विभागले आज र भोलि पनि देशका धेरै स्थानमा भारीदेखि अति भारी वर्षा हुन सक्ने चेतावनी जारी गरेको छ। विभागले नदी तटीय क्षेत्रका बासिन्दालाई सचेत रहन र सावधानी अपनाउन आग्रह गरेको छ।

काठमाडौं, १७ असोज । काठमाडौं जिल्ला प्रशासन कार्यालयले आगामी केही दिनहरूमा सम्भावित भारी वर्षाको पूर्वानुमानलाई ध्यानमा राख्दै नागरिकहरूलाई विशेष सतर्कता अपनाउन आग्रह गरेको छ । असोज १७ गतेदेखि २० गतेसम्म देशभर, विशेषगरी जोखिमयुक्त क्षेत्रमा बाढी, पहिरो तथा भू–क्षयको सम्भावना रहेकाले प्रशासनले अनावश्यक यात्रा नगर्न सुझाव दिएको हो ।

जिल्ला प्रशासन कार्यालयले अत्यावश्यक काम नभएमा लामो दूरीको यात्रा नगर्न र विशेष गरी रातिको समयमा काठमाडौँबाट बाहिरिने वा बाहिरबाट काठमाडौँ प्रवेश गर्ने यात्रुहरूलाई सावधानी अपनाउन अनुरोध गरेको छ । रातिमा यात्रा गर्दा संभावित जोखिम झनै बढ्ने भएकाले सकभर दिनको समयमा यात्रा गर्न प्रशासनको आग्रह छ । साथै, कुनै पनि विपद् वा आकस्मिक अवस्थाको खण्डमा तत्काल उद्धार, राहत र सहयोगका लागि सम्पर्क गर्न सकिने आपतकालीन नम्बरहरू समेत प्रशासनले सार्वजनिक गरेको छ ।

त्यसैगरी नेपाल सरकारले पनि मौसमसम्बन्धी जानकारीमा नियमित अपडेट लिन र सुरक्षित स्थानमा बस्न समेत अनुरोध गरेको छ ।