माघी नजिकिँदै जाँदा थारू समुदाय ढिक्री बनाउन व्यस्त

दाङ, २८ पुष । दाङको तुलसीपुर उपमहानगरपालिका–१२ कचेलीकी जानकी चौधरीलाई अहिले ढिक्री बनाउने चटारो छ । माघी नजिकिएसँगै उहाँ ढिक्री बनाउनमै व्यस्त हुनुहुन्छ ।

त्यस्तै तुलसीपुर–१० बनकाउकी विझौनी थारूलाई पनि अहिले ढिक्री बनाउने फुर्सद छैन । उहाँहरू मात्रै होइन, माघी पर्व नजिकिँदै जाँदा थारू समुदायका अधिकांश घरमा ढिक्री बनाउने तयारी तीव्र भएको छ ।

थारू समुदायले हरेक चाडपर्वमा मुख्य परिकारका रूपमा ढिक्री पकाउने गर्छन् । विशेषगरी सुँगुरको मासु, माछा, घोँगी लगायतका परिकारसँग ढिक्री खाने चलन छ । यी परिकार थारू समुदायका परम्परागत तथा प्रख्यात खाना मानिन्छन् ।

ढिक्री चामलको पीठोबाट बनाइन्छ । चामल पिसेर त्यसलाई पानीले मुछिन्छ र त्यसपछि लाम्चो आकार दिइन्छ । खासगरी माघीमा लाम्चो, दशैँमा गोलो र तिहारमा चेप्टो दियो जस्तो आकार बनाएर ढिक्री तयार पारिन्छ ।

यसरी तयार पारिएको ढिक्रीलाई पानीको बाफमा करिब आधा घण्टा जति उसिनाएपछि खान योग्य हुन्छ । उसिनेर बनाइने भएकाले ढिक्री स्वास्थ्यका लागि पनि राम्रो मानिन्छ ।

यसमा न त चिल्लो प्रयोग हुन्छ, न त चिनी नै हालिन्छ । ढिक्री खाएमा आयु बढ्छ भन्ने पौराणिक विश्वाससमेत थारू समुदायमा रहेको छ ।