- २६ असार २०८३, शुक्रबार / Jul 10, 2026
काठमाडौँ, १३ भदौ । नागरिक उन्मुक्ति पार्टीका संरक्षक रेशम लाल चौधरीको पछिल्लो अभिव्यक्तिप्रति थरुहट थारुवान् संयुक्त सङ्घर्ष समितिले कडा आपत्ति जनाएको छ । समितिले चौधरीले थारु नेताहरूलाई दोषारोपण गरेको अभिव्यक्तिलाई “निराधार र आन्दोलनको मर्म विपरीत” भन्दै सार्वजनिक माफी माग्न माग गरेको छ ।
गत साता नेपाल मगर सङ्घले आयोजना गरेको स्व. गोरेबहादुर खपाङ्गी मगरको नवौं स्मृति दिवसमा चौधरीले “मलाई थारु नेताहरूले जेल पठाए” भन्ने आशयको टिप्पणी दिएका थिए । उक्त अभिव्यक्तिलाई लिएर संघर्ष समितिले चौधरीप्रति गम्भीर आपत्ति जनाएको हो । संघर्ष समितिका संयोजक प्रेमीलाल चौधरीले जारी गरेको विज्ञप्तिमा चौधरीको आरोपलाई कपोकल्पित, भ्रामक र दुर्भावनापूर्ण भनिएको छ । साथै, आन्दोलनको मर्ममाथि प्रहार गर्दै गरिएको टिप्पणी थारु समुदायप्रति बेइमानी भएको दाबी गरिएको छ ।
विज्ञप्तिमा भनिएको छ, “थारु नेताहरूले झ्यालखानामा पु-याएको भन्नु केवल व्यक्तिगत असन्तुष्टि होइन, यो सम्पूर्ण आन्दोलन र नेतृत्वमाथिको अविश्वास र अपमान हो ।” थरुहट थारुवान् संयुक्त सङ्घर्ष समितिले विगतदेखि नै थारु समुदायका अधिकारका लागि निरन्तर संघर्ष गर्दै आएको दाबी गरेको छ ।
विशेष रूपमा:
यी सबै विषयमा समिति अग्रसर रहेको उल्लेख गर्दै समितिले रेशम चौधरीको अभिव्यक्तिले आन्दोलनको पवित्रता नै खल्बल्याउने खतरा रहेको चेतावनी दिएको छ । समितिले रेशम चौधरीलाई तत्काल उक्त अभिव्यक्ति फिर्ता लिनुका साथै सार्वजनिक रूपमा माफी माग्न आह्वान गरेको छ । अन्यथा थारु समुदाय र आन्दोलनप्रति अपमानजनक व्यवहारका विरुद्ध संघर्ष चर्काउने चेतावनी समेत दिएको छ ।
