- ३० भाद्र २०८३, मंगलवार / Sep 15, 2026
काठमाण्डौ । चार दिनदेखि आन्दोलनरत दोलखा जिल्लावासी, करार कर्मचारीहरूसँग सहमति भएको छ । माथिल्लो तामाकोशी जलविद्युत् आयोजनाले कम्पनीमा कार्यरत सबै कर्मचारीहरूको सेवा सुविधामा एकरूपता ल्याउने भएपछि सहमति भएको हो ।
दुई पक्षबीच भएको सहमतिमा आयोजना सञ्चालक समितिको आउँदो बस्ने पहिलो बैठकमा गएको फागुन महिनादेखि कार्यान्वयन हुने गरी चैत महिनाको तलबमा समावेश गराउन सहमति भएको जनाइएको छ ।
कम्पनीको प्रतिबद्धता अनुसार अब बाहिर जिल्लाबाट आएका र दोलखा जिल्लावासी करार कर्मचारीको तलब तथा अतिरिक्त सुविधाहरू समान हुनेछन् । त्यस्तै एकरूपता कायम गरिएको सेवा सुविधा गएको फागुन महिनादेखि नै लागू हुनेछ ।
कम्पनीले सबै कर्मचारीहरूको सेवा सुविधामा एकरूपता ल्याउने प्रतिबद्धता जनाएको छ । सहमतिसँगै कर्मचारीहरूले सङ्घर्षका सबै कार्यक्रम फिर्ता लिएका छन् विहिबारदेखि कर्मचारी नियमित काममा फर्किएका छन् ।
यसअघि कम्पनीले जिल्लाबाहिरकालाई ७५ र दोलखाकालाई ५० प्रतिशत सुविधा दिँदै आएको थियो । यो सहमति कार्यान्वयन भएपछि सेवामा एकरूपता आउने भएको छ । त्यसबाट जिल्लावासी कर्मचारीहरूको तलबसमेत बढ्ने निश्चित भएको छ ।
