- ३१ आश्विन २०८३, शनिबार / Oct 17, 2026
दाङ । निलम्बनमा परेका लुम्बिनी प्रदेश सभा सदस्य जानकीप्रसाद यादवको फुकुवा भएको छ। सभामुख तुलाराम घर्ती मगरले प्रदेश सभा सदस्य यादवको निलम्बन फुकुवा भएको प्रदेश सभाको चौथो अधिवेशनको ११औं बैठकमा जानकारी गराएका हुन ।
प्रदेश सभाले यादवलाई गत फागुन ११ गते मुद्दाको अन्तिम किनारा नलागे सम्मको लागी निलम्बन गरेको थियो। अख्तियार दुरुपयोग अनुसन्धान आयोगले सार्वजनिक सम्पत्ति वन पैदावारको हानी नोक्सानी गरी भष्ट्राचार गरेको शिर्षकमा विशेष अदालतमा मुद्धा दायर गरेको हो ।
यादव राष्ट्रिय प्रजातन्त्र पार्टीबाट कपिलवस्तु क्षेत्र नम्बर ३ को ‘ख’बाट प्रदेशसभा सदस्यमा निर्वाचित भएका थिए। प्रदेश सभामा राप्रपाका ४ जना सांसद छन्।
मुद्दामा यादवले सफाई पाएपछी प्रदेश सभाले निलम्बन फुकुवा गरेको हो। विशेष अदालतले जेठ ९ गते यादवलाई सफाई दिएको थियो। मुद्धाको फैसला भएको र यादवले सफाई पाएको बारेमा प्रदेश सभामा पत्र प्राप्त भएपछी निलम्बन फुकुवा गरिएको सभामुख घर्तीमगरको भनाई छ ।
