- २२ कार्तिक २०८३, आईतवार / Nov 8, 2026
काठमाडौं । बिपी राजमार्ग असोज ११ र १२ गते भएको लगातारको वर्षासँगै रोशी खोलामा आएको बाढीले क्षतिग्रस्त भएपछि बिपी राजमार्गमा सवारीसाधनको चाप बढेको छ ।
पूर्वी तराईका जिल्लालाई राजधानी काठमाडौँसँग जोड्न बिपी राजमार्गको नेपालथोक–भकुण्डेबेँसी खण्डमा ट्रयाक सडक निर्माण भएसँगै सवारीसाधनको चाप बढेको हो ।
रोशी खोलामा आएको बाढीले १० किलोमिटरभन्दा बढी सडक भत्किएको छ । भत्किएको ठाउँमा कतै एकतर्फी र कतै दोहोरो यातायात सञ्चालन हुने गरी अस्थायी ट्रयाक निर्माण गरिएको छ ।
नेपालथोक–भकुण्डेबेँसी खण्डको सडक बाढीले भत्काएपछि दुई सातासम्म बिपी राजमार्गमा यातायातका साधन गुड्न सकेका थिएनन् ।
यातायात अवरोध हटाउन खोलिएका ट्र्याकको मर्मत तथा सुधारकार्य जारी रहेकोले साँझ ६ बजेदेखि विहान ४ बजेसम्म यातायात सञ्चालनमा रोक लगाइएको छ । अहिले बिपी राजमार्ग सञ्चालन भएपछि राजधानी प्रवेश गर्ने र राजधानीबाट बाहिरी जिल्ला फर्किने यात्रुको चाप बढेको छ ।
