- ११ जेष्ठ २०८३, सोमबार / May 25, 2026
भक्तपुर । यसपालीको एसईई परीषा सम्पन्न भएको छ । चैत्र १५ गतेबाट संचालन भएको माध्यमिक शिक्षा परीक्षा एसईई २०८० शुक्रबार सम्पन्न भएकोहो । यसवर्ष ५ लाख बढी परिक्षार्थीले फारम भरेपनि जापानमा एक गरी देशभर २ हजार ६४ परिक्षा केन्द्रबाट ४ लाख ६७ हजार विद्यार्थी परीक्षामा सहभागि भएको बोर्डले जनाएको छ ।
पहिलो पटक लेटर ग्रेडिङ निर्देशिका २०७८ लागु गरेर परीक्षा संचालन भएको राष्ट्रिय परीक्षा बोड जनाएको छ । नयाँ पाठ्यक्रम अनुसार ३५ प्रतिशत अनिवार्य ल्याउनै पर्ने भएपछि विद्यार्थीले पढाइलाई नै केन्द्रीत गरेर पढेको शिक्षकले बताएका छन् । एसइई आइरन गेट जस्तै भएकाले मेहनत गरेर परीक्षा दिएको विद्यार्थीहरुको भनाई छ ।
परीक्षालाई अमर्यादित बनाउँन खोज्नेलाई कारबाही समेत गरिएको बोर्डले जनाएको छ । समग्रमा परीक्षा शान्तिपूर्ण तरीकाले सम्पन्न भएको र अझै परीक्षालाई सुधार गर्ने पक्षमा रहेको राष्ट्रिय परीक्षा बोर्डका अध्यक्ष डा.महाश्रम शर्माले जानकारी दिनुभयो ।
विगत वर्षका परीक्षामा ३५ अंक ल्याए पुग्थ्यो तर लेटर ग्रेडिङ निर्देशिका २०७८ लागु भएपछि सैद्धान्तिकमा ३५ र प्रयोगात्मकमा ४० प्रतिशत अंक अनिवार्य ल्याउनुपर्ने व्यवस्था छ । विद्यार्थीको सिकाई उपलब्धिको मापनबाट प्राप्त अङ्कगत स्तरलाई आठ ओटा अक्षरगत स्तरमा सूचित गरिएको छ । जसको नतिजामा सर्वाेत्तम (ए प्लस), अत्युत्तम (ए), उत्कृष्ट (बी प्लस), उत्तम (बी), सन्तोषजनक (सी प्लस), ग्राह्य (सी), आधारभूत (डी) र अवर्गीकृत (एनजी) उल्लेख हुनेछ ।
देशभर ५२ परिक्षण केन्द्र निर्धारण गरी उत्तर पुस्तीका व्यवस्थापन गरिएको र जापनबाट उत्तरपुस्तीका आइसकेपछि असार तेस्रो साता रिजल्ट सार्वजनिक गर्ने तयारी गरेको राष्ट्रिय परीक्षा बोर्डले जनाएको छ ।
