- २६ असार २०८३, शुक्रबार / Jul 10, 2026
काठमाडौँ, २७ भाद्र । अध्यागमन विभागले सेप्टेम्बर ८ पछि भिसा अवधि सकिएका विदेशी पर्यटकलाई निःशुल्क भिसा नियमित गर्ने भएको छ ।
विभागका निर्देशक टीकाराम ढकालले विज्ञप्ति जारी गर्दै हालको असामान्य परिस्थितिका कारण भिसा थप गर्न नसकेका विदेशी नागरिकलाई त्रिभुवन अन्तर्राष्ट्रिय विमानस्थल अध्यागमन कार्यालयबाटै सहज रूपमा भिसा नियमित गरी प्रस्थान अनुमति दिने बताए ।
उनका अनुसार सेप्टेम्बर ८ सम्मको भिसा मान्य भएका र कर्फ्यू आदेश जारी भएको अवधिमा नेपाल छाड्नुपर्ने अवस्थामा रहेका विदेशी नागरिकलाई कुनै अतिरिक्त शुल्क नलिई भिसा नियमितीकरण र प्रस्थान अनुमति दिइनेछ ।
त्यस्तै, यस अवधिमा राहदानी हराउने तथा सम्बन्धित दूतावासबाट आपतकालीन यात्रा कागजात (ट्राभल डकुमेन्ट) लिइसकेकाका लागि विद्यमान नियमानुसार भिसा हस्तान्तरण र नियमितीकरणको व्यवस्था मिलाइएको छ ।
नेपाल पर्यटन बोर्डले यस विषयमा अध्यागमनसँग समन्वय गर्दै पर्यटकलाई सहज आवागमनका लागि सटल बस, होटल–विमानस्थल यातायात, र २४ सै घण्टा कर्मचारी तैनाथ गर्ने व्यवस्था मिलाइएको जनाएको छ ।
जेनजी प्रदर्शनका कारण भदौ २४ गते दिउँसो २:३० बजेदेखि बन्द भएको त्रिभुवन अन्तर्राष्ट्रिय विमानस्थल २५ गते दिउँसो २:३० बजे मात्र पुनः सञ्चालनमा आएको थियो ।
