त्रिभुवन विश्वविद्यालयको शैक्षिक क्यालेन्डर स्वीकृत

काठमाडौं । त्रिभुवन विश्वविद्यालयले शैक्षिक सत्र २०८१ को शैक्षिक क्यालेन्डर स्वीकृत गरेको छ । २०८१ असार २५ गते बसेको त्रिवि प्राज्ञिक परिषद् स्थायी समितिको बैठकको निर्णय नम्बर १९६ ले वार्षिक शैक्षिक क्यालेन्डर स्वीकृत गरेको हो ।

त्रिवि शिक्षाध्यक्षको कार्यालयले उक्त शैक्षिक क्यालेन्डर लागू गर्न मातहतका निकायहरूलाई निर्देशन पनि दिएको छ । त्रिवि अन्तर्गतका अध्ययन संस्थान, संकाय, आङ्गिक क्याम्पस, केन्द्रीय विभागहरू तथा कार्यक्रम लगायतका निकायहरूलाई शैक्षिक क्यालेन्डर लागू निर्देशन दिएको हो । त्रिविले स्नातक तह र स्नातकोत्तर तहको वार्षिक प्रणाली तथा सेमिस्टर प्रणाली अनुसारको क्यालेन्डर बनाएको हो ।