- २२ भाद्र २०८३, सोमबार / Sep 7, 2026
उदयपुर, १८ जेठ । निरन्तर वर्षासँगै आएको बाढी र पहिरोका कारण उदयपुर जिल्लाका पहाडी भेगका अधिकांश ग्रामीण सडक अवरुद्ध भएका छन् । शनिबार बिहानदेखि परेको अविरल वर्षाले सदरमुकाम गाईघाटबाट रौता–सल्ले, रौता–भुटार, रौता–नामन्त, नामेटार–ओख्रेनी, रामेटार–भदौरे, पाँबु लगायतका सडक अवरुद्ध छन् ।
स्थानीय विष्णु पाठक र डिल्लीराम मगरका अनुसार पहिराले सडक भत्किएका छन् भने कतिपय ठाउँमा सडक पूरै पुरिएको छ । रौता–मुर्कुची–डिल्लीबर–माझखर्क खण्डमा बाढीले सडक बगाउँदा सवारी आवागमन ठप्प छ । माझखर्कका जम्बु शेर्पाले मोटरसाइकलसम्म चलाउन नसकिने अवस्था रहेको बताए ।
लिम्चुङबुङ बासबोटे, भलायाडाँडा–बर्रे, डुम्रे–उदयपुरगढी सडकसमेत अवरुद्ध छन् । बेलका नगरपालिका–८ को कोठुबाट मैनामैनी जोड्ने सडक भत्किएर अवरुद्ध भएको जानकारी स्थानीय गङ्गा मगरले दिइन् । शनिबारको भारी वर्षाले चारवटा पहाडी गाउँपालिकाका सडकहरू सञ्चालनमा नरहेको जनाइएको छ ।
