- १८ असार २०८३, बिहीबार / Jul 2, 2026
काठमाडौँ । मेडिकल व्यवसायी दुर्गा प्रसाईंको कार्यक्रमका लागि भनी आएका महिलाहरूको एक समूहलाई मंगलबार राति युवाहरुले लखेटे ।
प्रसाईले नेकपा एमालेको भातृ संगठन युवा संघका कार्यकर्ताहरूले मध्यराति बास बस्न लागेका महिलाहरूलाई पार्टी प्यालेसबाट लखेटेको गम्भीर आरोप लगाएपछि यसबारे प्रहरीले छानबिन थालेको छ ।
प्रारम्भिक अनुसन्धानमा एमालेकै युवा संघको एक टोलीले उक्त घटना गराएको पत्ता लागिसकेको प्रहरीले बताएको छ ।घटना मंगलबार राति भक्तपुरको मध्यपुर थिमि नगरपालिकास्थित लोकन्थलीको इन्द्रसान बैंक्वेट (पार्टी प्यालेस)मा भएको हो ।
राति करिब १० बजेतिर सो पार्टी प्यालेसको खाली हलमा भुइँमा म्याट लगाएर सुत्न लागेका करिब ३०–३५ जना महिलाको समूहलाई युवाहरूले उठाएर बाहिर निकालेको देखिन्छ । उनीहरू इटहरीबाट ७ गतेको दुर्गा प्रसाईको कार्यक्रमका लागि आएको भन्ने भिडियोकै संवादबाट थाहा हुन्छ ।
भित्र पसेका केही युवाहरूले यहाँ बस्न मिल्दैन भनेर उनीहरूलाई लखेटेका छन् । आफैले भिडियो बनाउँदै आफैले प्रश्नोत्तर गरिरहेका ती युवाहरूले धम्कीपूर्ण शैलीमा उठाएपछि महिलाहरू निरीह हुँदै सडकमा निस्केको देखिन्छ ।
पछि राति ३ बजेतिर मात्र ती महिलाहरू गौशाला पुगेर बास बसेको प्रहरी स्रोतको भनाइ छ ।
