- १३ बैशाख २०८३, आईतवार / Apr 26, 2026
काठमाडौँ, १२ असार । काठमाडौँको टोखास्थित विष्णुमती खोलामा आएको बाढीले बगाएको कारभित्र रहेकी एक महिला सकुशल उद्धार भएकी छिन्।
बुधबार राति करिब १० बजेतिर टोखाको ग्राण्डी अस्पताल नजिकबाट खोलाले बगाएको बाग्मती प्रदेश ०३१ च ६१४१ नम्बरको कारमा ३४ वर्षीया भावना ओली सवार थिइन्।
दाङ, तुलसीपुर घर भई हाल टोखा बस्दै आएकी ओलीलाई नेपाल प्रहरी र स्थानीयवासीले बानियाटार पुल नजिकबाट सकुशल उद्धार गरेका हुन्। प्रहरीका अनुसार कारका चालक तत्काल गाडीबाट हाम फालेर निस्कन सफल भए पनि भावना ओली भने गाडीभित्रै थिइन्।
विष्णुमतीको तिब्र बहावमा कार बगिरहेको देखेपछि उद्धार टोलीले गाडी पछ्याउँदै गएर अन्ततः उनलाई सुरक्षित रुपमा बाहिर निकाल्यो। उद्धारपछि भावना ओलीको अवस्था सामान्य रहेको प्रहरीको भनाइ छ। खोलामा बगेको कारलाई क्रेनको सहायताले बाहिर निकालिएको छ।
यस घटनाले राजधानी क्षेत्रमा निरन्तर वर्षाका कारण खोलानालामा आउने आकस्मिक बाढीबाट सतर्क रहनुपर्ने आवश्यकता झल्काएको छ।
