अध्यागमन विभागको महानिर्देशकमा रुद्रसिंह तामाङ

काठमाडौं । गृह मन्त्रालयले १० जना सहसचिवको जिम्मेवारी हेरफेर गरेको छ ।अध्यागमन विभागको महानिर्देशकमा रुद्रसिंह तामाङलाई पठाएको गृह मन्त्रालयले जनाएको छ ।

यसअघि उनी राष्ट्रिय विपद् जोखिम न्यूनीकरण तथा व्यवस्थापन प्राधिकरणमा कार्यरत थिए । महानिर्देशक झलकराम अधिकारी सुन तस्करीमा संलग्न दावा छिरिङसँग साठगाठ रहेको खुलेपछि गृह मन्त्रालय तानेर उनलाई अहिले सामान्य प्रशासन मनत्रलयको अतिरिक्त समूहमा सरुवा गरेको छ ।

अबदेखि तामाङले अध्यागमन विभागको नेतृत्व गर्नेछन् । विपद व्यवस्थापन प्राधिकरणमा जयनारायण आचार्य पुगेका छन् । त्यसैगरी त्रिभुवन विमानस्थल अध्यागमन प्रमुखमा गोगनबहादुर हमाल सरुवा भएका छन् ।

गृहले चार जना प्रमुख जिल्ला अधिकारीहरु फेरेको छ । रोशनीकुमारी श्रेष्ठ भक्तपुरको प्रमुख जिल्ला अधिकारी बनाइएको छ भने सहसचिव गणेश अर्याललाई रुपन्देहीको प्रमुख जिल्ला अधिकारीका रुपमा पठाइएको छ ।

यसअघि ललितपुर महानगरपालिकामा प्रमुख प्रशासकीय अधिकृत रहेका उनले गृह प्रशासनमा पुगेलगत्तै जिल्ला प्रशासन कार्यालय रुपन्देहीमा मौका पाएका हुन् ।

त्यसैगरी रामवन्धु सुवेदीलाई दाङ र शिवराम गेलाललाई महोत्तरीको प्रमुख जिल्ला अधिकारीका रुपमा सरुवा गरेको छ । सहसचिवहरु दीपककुमार पहाडी, भरतमणि पाण्डे, खगेन्द्रप्रसाद रिजालको गृह मन्त्रालयमा सरुवा भएको छ ।