- २८ बैशाख २०८३, सोमबार / May 11, 2026
काठमाडौं । १७ वर्ष पहिले रौतहटको गौरमा भएको हत्या प्रकरण फेरि विवादमा आएको छ । पीडितसँग सरकारले न्यायको प्रतिबद्धतासहित सहमति गरेपछि जनता समाजवादी पार्टी तरङ्गित बन्न पुगेको छ ।
माओवादी केन्द्रमा लामो समय राजनीति गरेर छुट्टै पार्टी खोलेका आम जनता पार्टीका अध्यक्ष प्रभु साह यतिबेला गौर प्रकरणलाई चर्काउदै लग्ने पात्रमा पर्छन् । जसपा अध्यक्ष उपेन्द्र यादवलाई फसाएर आफ्नो राजनीति अघि बढाउने योजनामा साह छन् ।
२७ माओवादी नेता कार्यकर्ताको पाशविक ढंगले गरिएको हत्याको छानविन सरकारले नगरेको भन्दै पीडितहरु आन्दोलनमा थिए । तर, पुष्पकमल दाहाल ’प्रचण्ड’ ले १७ वर्षपछि यो प्रकरणमा अनुसन्धान गर्ने प्रतिबद्धतासहित सहमति त गराए ।
तर, के अनुसन्धान संभव होला ? प्रश्न गर्न थालिएको छ । सरकारले पीडितसँग सहमति गरेपछि जनता समाजवादी पार्टी भने त्रसित बन्न पुगेको छ । जसपाले पत्रकार सम्मेलन नै गरेर सरकारले चालेको कदमले गम्भीर समस्या निम्त्याउने भन्दै चेतावनी नै दिएको छ ।
