- ९ आश्विन २०८३, शुक्रबार / Sep 25, 2026
पाँचथर । फालेलुङमा चौँरी महोत्सवको छैटौँ संस्करण चैत ३० देखि वैशाख २ गतेसम्म सञ्चालन हुने भएको छ । २०७४ सालदेखि आयोजना हुँदै आएको चौँरी महोत्सव यो वर्ष पनि आयोजना हुन लागेको हो ।
महोत्सवलाई ‘छैटौँ फालेलुङ चौँरी पर्यटन महोत्सव’ नाम दिइएको छ । फालेलुलुङ गाउँ पालिकाको प्रवर्धनमा फालेलुङ कञ्चनजङ्घा पर्यापर्यटन प्रवर्धन संस्था र दीप ज्योति युवा क्लबले महोत्सवको आयोजना गर्न लागेका हुन् ।
फालेलुङ ४ चाररातेमा हुने महोत्सवको तयारी भइरहेको आयोजकले जानकारी दिएको छ । हिमालको पर्यायका रूपमा स्थापित चौँरी गाई र तिनका प्रजातिको संरक्षणसँगै चौँरीजन्य उत्पादनहरूको प्रवर्धन र बजारीकरण गर्ने उद्देश्यले महोत्सव आयोजना गरिएको गाउँपालिका उपाध्यक्ष महेन्द्रहाङ जवेगुले बताए ।
पाँच सय भन्दा धेरै चौँरी र याकको प्रदर्शनी गरिने छ भने याक राइडिङ, हर्स राइडिङ जस्ता गतिविधि पनि महोत्सवमा राखिएको संस्थाका उपाध्यक्ष शिल्प राईले बताए ।
महोत्सव क्षेत्रमा चौँरी र भेडाजन्य उत्पादनका स्टल राखिने छ । नेपालका विभिन्न जिल्लासँगै भारतको पन्जाब, वेष्ट बङ्गाल, कोलकत्तासँगै भुटान हुँदै विभिन्न मुलुकका आन्तरिक र बाह्य गरी दुई हजार भन्दाबढी पर्यटक ल्याउने आयोजकको लक्ष्य छ ।
