बाँकेमा झडप, एकको मृत्यु, १२ जना घाइते

बाँके । पूर्णिमाको अवसरमा लागेको मेलामा दुई समूहबीच झडप हुँदा एकजनाको मृत्यु भएको छ । अन्य १२ जना घाइते भएका छन् । जानकी गाउँपालिका–५ गुरूगाउँका ५४ वर्षीय धनीराम यादवको मृत्यु भएको प्रहरीको भनाई छ ।

बाबु यादव र राम नरेश गुप्ताबीच पूर्व रिसिबीका कारण भएको विवादमा दुई पक्षबीच झडप भएको हो । नागबाबा कुटीमा लागेको कात्तिके पूर्णिमा मेलामा पुरानो रिसिबीलाई लिएर विवाद भएको र सोही विवादलाई लिएर बानियाँगाउँमा भेला भई धनीरामलाई कुटपिटगरी गम्भीर घाइते बनाए ।

नर्सिङ होम नेपालगञ्जमा उपचारको क्रममा धनीरामको मृत्यु भयो ।झडपमा अन्य १२ जना घाइते भएका छन् । जिल्ला प्रहरी कार्यालय बाँके र सशस्त्र प्रहरी गण खजुरा बाँकेबाट खटिएको प्रहरी टोलीले संलग्न १४ जनालाई नियन्त्रणमा लिई अनुसन्धान थालेको छ ।