बाजुरालाई केन्द्रबिन्दु बनाएर लगातार भूकम्प

काठमाण्डौ । आइतबार राति दश बजेर २७ मिनेट जाँदा बाजुरामा भूकम्प गएको छ । बाजुरको साप्पाटालाई केन्द्रबिन्दु बनाएर ४ दशमलव ३ रेक्टर स्केलको भूकम्प गएको हो । पछिल्लो समय बाजुरालाई केन्द्रबिन्दु बनाएर लगातार भूकम्प गइरहेको छ । यसअघि गएको फागुनको १० गते ५ दशमलव २ रेक्टर स्केलको भूकम्प गएको थियो ।

भूकम्पको धक्का बाजुरासहित आसपासका जिल्लामा समेत महसुस गरिएको राष्ट्रिय भूकम्प मापन केन्द्रले जनाएको छ । पश्चिम नेपालमा ५ सय वर्षभन्दा लामो समयदेखि ठूलो भूकम्प नगएको र त्यहाँको भूगर्भमा धेरै ऊर्जा सञ्चित भएर बसेकाले जोखिम कायमै रहेको भूगर्भविद्ले बताउँदै आएका छन् ।

माघको १० र १२ गते पनि बाजुरामा भूकम्पको धक्का महसुस गरिएको थियो । माघ १० गते ५ दशमलव ९ रेक्टर स्केलको भूकम्प गएको थियो ।