- २७ असार २०८३, शनिबार / Jul 11, 2026
४ असार २०७७ काठमाडौंं । देशका दस स्थानमा रहेका नुनदेखि सुनसम्मको खानी अन्वेषण तथा उत्खनन गर्न सरकारले सूचना आह्वान गरेकाे छ । सुन, तामा, चुनढुङ्गा, नुन, कोइला, ग्रेनाइट र केओलिनलगायतका खनिज पदार्थको अन्वेषण तथा उत्खननका लागि खानी तथा भूगर्भ विभागले अनुमति प्रदान गर्न सूचना आह्वान गरेको छ ।
देशका विभिन्न दस ठाउँमा रहेको खानीको अन्वेषण तथा अध्ययनका लागि अनुमति प्रदान गर्न सूचना आह्वान गरिएको खानी तथा भूगर्भ विभागले जनाएकाे हाे । १० वटामध्ये चार ठाउँमा उत्खनन (माइनिङ) गर्न र बाँकी ठाउँमा अन्वेषण (प्रोसपेक्टिङ)का लागि अनुमतिपत्र प्रदान गर्न सूचना आह्वान गरिएको विभागका महानिर्देशक रामप्रसाद घिमिरेले बताए ।
अन्वेषणको अनुमति पत्रका लागि ३५ दिन र उत्खननका लागि ५० दिनभित्र निवेदन दिन आह्वान गरिएको उनले बताए । उत्खननका लागि दसदेखि तीस वर्ष र अन्वेषणका लागि दुई वर्ष प्रदान गरिने घिमिरेको भनाइ छ ।
कुन जिल्लामा कहाँ के छ ?
रोल्पा – सुनछहारी गाउँपालिकास्थित किमासेपोझार वनमा ३० वर्गकिलोमिटर क्षेत्रमा फैलिएको सुनखानीको अन्वेषण गर्न । त्यहाँ करिब ८० हजार टन सुनको कच्चा पदार्थ रहेको अनुमान छ ।
धादिङ, मकवानपुर र उदयपुर – तामाखानी अन्वेषण गर्न ।
पाल्पा- कोइला खानीको अन्वेषण गर्न अनुमति पत्र प्रदान गर्न सूचना आह्वान ।
सल्यान, धादिङ – चुनढुङ्गाको उत्खनन गर्न ।
मुस्ताङ – नुन खानी उत्खनन गर्न अनुमति लिनका लागि सूचना आह्वान गरिए छ ।
अन्वेषण तथा उत्खननका लागि इच्छुक कम्पनीहरूले पेस गरेका प्राविधिक तथा आर्थिक प्रस्तावहरूमध्ये सबैभन्दा पहिले प्राविधिक प्रस्तावको मूल्याङ्कन गरिने, प्राविधिक प्रस्तावको मूल्याङ्कनमा उत्कृष्ट ठहरिएका कम्पनीको आर्थिक प्रस्तावको मूल्याङ्कन गरिने विभागले जनाएकाे छ ।
