- २८ जेष्ठ २०८३, बिहीबार / Jun 11, 2026
काठमाडौं । चार दलसम्मिलित नवघोषित समाजवादी मोर्चालाई नेपाल समाजवादी पार्टीका अध्यक्ष बाबुराम भट्टराईले बार्गेन गर्ने मोर्चामात्र भएको बताएका छन् ।
समाजवाद संसदीय अंकगणित मिलाएर र जालझेल गरेर आउने उपभोग्य वस्तु नभएको टिप्पणी गर्दै भनेका छन्, ‘समाजवाद संसदीय अंकगणित मिलाएर र जालझेल गरेर आउने उपभोग्य वस्तु होइन ।
यो त उदात्त वैचारिकीको निर्देशनमा उन्नत चेतना र उच्च नैतिक धरातल भएका मानवको लामो सामूहिक प्रयत्नले निर्माण हुने अति उन्नत सभ्यताको चरण हो। कथित समाजवादी मोर्चालाई निजी सत्ता स्वार्थका निम्ति भित्री र बाहिरी शक्तिहरूसँग बार्गेनको हतियार बनाउने दुष्कर्म नहोस्, केहीलाई सधैं र धेरैलाई केहीबेर ठग्न सकिन्छ तर सबैलाई सधैं ठग्न सकिन्न भन्ने हेक्का रहोस् ।’
हिजोमात्र नेकपा माओवादी, नेकपा एस, जसपा र विप्लव नेतृत्वको नेकपाले समाजवादी मोर्चा घोषणा गरेका थिए। अन्तिम समयमा आफूलाई बाहिरै पारिएपछि बाबुरामको कडा प्रतिक्रिया दिएका हुन् ।
उपेन्द्र यादव नेतृत्वको जसपा पार्टीबाट बहिर्गमनमा परेपछि प्रगतिशील र वामपन्थी शक्तिलाई एकै ठाउँमा ल्याएर समाजवादी मोर्चा बनाउनुपर्ने पक्षमा उनी लागेका थिए । मोर्चाको अवधारणाबारे माओवादी अध्यक्ष प्रचण्ड, नेकपा महासचिव विप्लवसहितका नेताहरुलाई कन्भिन्स गराएका थिए ।
त्यसपछि भट्टराईले कम्युनिष्ट विचार र सिद्धान्त मान्ने दल नेकपा एसका अध्यक्ष माधवकुमार नेपाललाई पनि मोर्चा निर्माणको रणनीतिबारे प्रष्ट पारे । भट्टराई, नेपाल र प्रचण्डबीच कैयौं पटक यसै विषयमा छलफल भएको थियो ।
माओवादी पूर्वघटकबीच एकता नै गर्ने रणनीति थियो बाबुरामको । निरन्तर छलफलपछि असारभित्रै समाजवादी मोर्चा बनाउने विषयमा समझदारीसमेत जुटेको थियो । तर, हिजो सार्वजनिक भएको समाजवादी मोर्चा घोषणामा भने बाबुराम अटाउन सकेनन्।
