सरकारबाट अनुदान रकम नपाउँदा किसान आर्थिक संकटमा

सर्लाही । उखु किसानलाई सरकारले समयमा पैसा नपठाउँदा किसान आर्थिक संकटमा परेका छन् । सरकारले आवश्यक रकम अनुदान दिन नसकेको कारण किसान मर्कामा परेका हुन । चाडपर्व भित्रिएको र यही बेला नयाँ उखु रोप्ने समय भएकाले सरकारबाट अनुदान रकम नपाउँदा किसान आर्थिक संकटमा परेको नेपाल उखु उत्पादक महासंघले जनाएको छ ।

कोष तथा लेखा नियन्त्रक कार्यालय मलङ्गवाले सर्लाहीका लागि प्राप्त हुनुपर्ने २९ करोड २५ लाख ५२ हजार ७४९ रुपैयाँ ०३ रुपैयाँमध्ये गत बिहीबार नौ करोड मात्रै प्राप्त भएको उल्लेख गरेको छ ।

सरकारले गएको वर्ष क्रसिङ सिजन २०७९÷०८० मा उखुको मूल्य प्रतिक्विन्टल ६ सय १० रुपैयाँ निर्धारण गरेकोमा चिनी उद्योगले ५ सय ४० रुपैयाँ भुक्तानी गर्ने र बाँकी ७० रुपैयाँ सरकारले अनुदान बापत उपलब्ध गराउने उल्लेख छ । कोष तथा लेखा नियन्त्रक कार्यालय मलङ्गवाले बाँकी रकम निकासा भए किसानको खातामा पैसा पठाउन सम्भव हुने जनाएको छ ।