सैनिक इतिहास जगेर्ना गर्ने नेपाली सेनाको गोरखा–जितगढी पदयात्रा सुरु

काठमाडौं । ऐतिहासिक महत्त्व बोकेका गढी, किल्ला, युद्धस्थल, पदमार्ग लगायतका धरोहरको संरक्षण‚ संवर्धन तथा नेपालको सैनिक इतिहासको जगेर्ना गर्ने उद्देश्य बोकेको नेपाली सेनाको गोरखा–जितगढी पदयात्रा सुरु भएको छ ।

२०७९ चैत्र २९ गते गोरखा–जितगढी पदयात्रा गोरखा नगरपालिका ६ स्थित गोरखा दरबारबाट शुरु भएको हो । पदयात्रामा नेपालको राष्ट्रिय झण्डा, नेपाली सेनामा सबैभन्दा पहिले खडा भएका पाँच स्थायी कम्पनी (श्रीनाथ, कालीबक्स, पुरानो गोरख, वर्दवाणी र सबुज) हरु तथा जितगढी लडाईमा सहभागी गुरुबक्स गुल्मको झण्डासहित गोरखा जिल्लामा तैनाथ श्री रिपुमर्दन गणबाट ऐतिहासिक पोशाक तथा परम्परागत बाजागाजा सहितको टोली सहभागी रहेका छन्।

पश्चिम पृतनापति उपरथी श्री दिपक कुमार बाँनियाले शुभारम्भ गरेको पदयात्रामा गोरखाबाट सहभागी फौजले तनहुँ जिल्लामा तैनाथ फौजलाई गोरखाको सतीघाटमा, तनहुँ जिल्लामा तैनाथ फौजले पाल्पा जिल्लामा तैनाथ फौजलाई तनहुँको केलादीघाटमा र पाल्पा जिल्लामा तैनाथ फौजले रुपन्देही जिल्लामा तैनाथ फौजलाई पाल्पाको नुवाकोटगढीमा झण्डा हस्तान्तरण गर्ने नेपाली सेनाले जनाएको छ ।

पदयात्राको दूरी करिब २०७ किलोमिटर हुने बताइएको छ। पदयात्रा गोरखा, तनहुँ, स्याङ्गजा, पाल्पा हुँदै मिति २०८० वैशाख ०७ गते रुपन्देही, बुटवलस्थित जितगढी पुगेर समापन हुने जनाइएको छ ।