- ९ बैशाख २०८३, बुधबार / Apr 22, 2026
काठमाडौं । काठमाडौंमा बर्ड फ्लु भित्रिएपछि पालिएका पन्छी नष्ट गरिदैछ । बर्ड फ्लुको संक्रमण भेटिएका तारकेश्वर नगरपालिका वडा नं. ७ साङ्लेखोलाका स्थानीय कृषकहरूले बोइलर, टर्की र हाँस नष्ट गर्न लागेका छन् ।
उनीहरुले पालेका टर्की र कुखुरा मरेपछि नमूना केन्द्रीय पशुपन्छी रोग अन्वेषण प्रयोगशालामा रियल टाइम पीसीआर बिधिबाट परीक्षण गर्दा बर्ड फ्लु पुष्टि भएको पशु सेवा विभागले जानकारी दिएको छ । रोग अन्यत्र फैलन नदिन संघ, प्रदेश तथा स्थानीय तहका पशु सेवासँग सम्बन्धित निकायलाई परिचालन गरी करिब साढे २३ सय पन्छी नष्ट गरिसकिएको विभागले जनाएको छ ।
यस क्रममा १ हजार ८ सय ६५ हाँस, ६ सय २२ बट्टाई, ३२ कुखुरा, २५ टर्की, ५ सय ४२ अण्डा र ७५ केजी दाना नष्ट गरिएको हो । विभागले पन्छी तथा पन्छीजन्य उत्पादनको ओसारपसार गर्दा अनिवार्य रुपमा स्वास्थ्य परीक्षण गरी भेटेरिनरी प्रमाणपत्र लिएर मात्र गराउन आग्रह गरेको छ ।
सरकारले पन्छी फार्म वा अन्य पन्छीपालन वा बिक्रीस्थलमा अस्वाभाविक रूपमा पन्छी बिरामी परेमा वा मरेमा तत्काल नजिकको पशु सेवाका निकायमा सूचना गर्न पनि आग्रह गरेको छ ।
