- २६ भाद्र २०८३, शुक्रबार / Sep 11, 2026
काठमाण्डौ ।काठमाण्डौमा विश्वकै सबैभन्दा धेरै वायु प्रदूषण देखिएको छ । काठमाण्डौको एक्यूआई अहिले ४२१ रहेको हावाको शुद्धता मापन गर्ने आइक्यू एअर डटकमले जनाएको छ । यो प्रदूषण अझै केही दिन रहने देखिएको छ ।
स्वास्थ्यका लागि हानिकारक अवस्थामा पुगेको हावाको प्रदूषण खतराको अवस्थाबाट अझै तल झरेको छैन । काठमाण्डौमा एक्यूआई ४७० सम्म पुगेको प्रदुषण सुधार हुन अझै समय लाग्ने जिकिर वातावरण विभागको छ । आँखा पोल्ने, नाक खिरखिराउने र गला पोल्ने यस प्रदुषणले स्वास्थ्यमा निकै समस्या पैदा गर्ने वातावरण विज्ञको भनाई छ ।
के हो त कारण ?
नेपालका धेरैजसो जिल्लामा लागेको डढेलो प्रदुषणको मुख्य कारण रहेको छ । पानी पर्ने सम्भावना नरहेकाले वायुमण्डल सुधार हुने सम्भावना पनि नरहेको मौसम पूर्वानुमान महाशाखाले जनाएको छ । यता भक्तपुर, कीर्तिपुर, भैंसेपाटी, सिमरालगायतका विभिन्न ठाउँको एक्यूआई तीन सय नाघेको छ ।
यो घातक प्रदुषण भएकाले केही दिन मर्निङवाकमा नजान र फोहर नजलाउन विज्ञको सुझाव छ । हावाको प्रदूषण अत्याधिक बढेको र सबैभन्दा धेरै काठमाण्डौमा देखिएको मापन केन्द्रले जनाएको छ ।
यो स्वास्थ्यका लागि निक्कै घातक रहेको र यस्तो अवस्थामा विपद् घोषणा गर्नुपर्ने वातावरणविद्हरुले सुझाव दिएका छन् । क्यान्सरजन्य रसायनसमेत प्रदुषणमा मिसिएकोले यस्तो बेलामा छातीको रोगमात्र नभएर क्यान्सरको जोखिमसमेत हुने विशेषज्ञरुले बताएका छन् ।
