- २ श्रावण २०८३, शनिबार / Jul 18, 2026
काठमाडौं । नक्कली भुटानी शरणार्थी प्रकरणमा दोषी ठहर हुनबाट बचाउन परपञ्च रचिदै गरेको जनगुनासा उठ्न थालेका छन् । जिल्ला अदालत काठमाडौंमा जारी थुनचेक बहसमा पनि तीन दिन यता बहसको अन्त्य अनौठो गरी हुन थालेको छ ।
अभियुक्तलाई थुनामा राखेर वा धरौटी वा तारेखमा छोडेर मुद्दाको सुनुवाई गर्ने निर्णय दिन बहस सक्दो छोट्याउने गरिन्छ । तर तीन दिनदेखि यता भने यो प्रयास बिथोलिँदै आएको बुझिएको छ ।
टेकनारायण पाण्डेका वकीलले बहस सकाएपछि बाँकी अभियुक्तका कानून व्यावसायी तयार नहुँदा जेठ २८ अपरान्ह साढे ४ बजे नै इजलास स्थगित भएको थियो । पूर्व गृहमन्त्री बालकृष्ण खाणका कानून व्यावसायीलाई बहस आजै सक्न न्यायाधीश न्यौपानेले आग्रह गरे ।
तर १० जनाले बहस गर्दा पनि थप वकील बहसका लागि अगाडि बढे । थुनचेक बहसमा सुनुवाई लम्बिरहेको छ । खाणको प्रतिरक्षामा मात्र बारका वर्तमान पदाधिकारीदेखि पूर्व पदाधिकारीसम्मले बहस गर्दैछन् । खाणका तर्फबाट बहस गरेका वकीलले ६ वटा विषयमा प्रतिरक्षा गरेका छन् ।
नेपालीलाई नक्कली भुटानी शरणार्थी बनाएर अमेरिका उडाउने प्रकरणमा संगठित गिरोह चलाएको आरोपमा प्रहरीले ३० जना विरुद्ध मुद्दा दायर गरेको छ । जसमध्ये १८ जना पक्राउ परेका छन् भने बाँकी फरार छन् ।
२८ करोड ८१ लाख ७४ हजार ५ सय रुपैयाँ बिगोसहित ठगी, संगठित अपराध, लिखत कीर्ते, राष्ट्रहित प्रतिकुलको कसुर र एकीकृत कसुरमा मुद्दा विचाराधीन छ । दोषीलाई हदैसम्मको कारबाही हुनुपर्ने वकिलहरुले बहस गरिरहेका छन् ।
जनस्तरबाट पनि राष्ट्रद्रोहीहरुलाई हदै सम्मको कारबाहीको माग उठेको छ । दोषी नउम्किउन र निर्दोष नफसुन भन्ने आधारबाट वकिलहरुले बहसलाई अगाडि बढाइरहेको बताएका छन् ।
