चैनपुर केन्द्रविन्दु भएर आएको भूकम्पका कारण छ जना घाइते

बझाङ । मङ्गलवार दिउँसो चैनपुर केन्द्रविन्दु भएर आएको भूकम्पका कारण छ जना घाइते छन् । भूकम्पका कारण बझाङमा छ जना घाइते भएको जिल्ला प्रहरी कार्यालयले बझाङले जनाएको छ । भूकम्पका कारण पहिरो गएपछि जयपृथ्वी राजमार्ग अवरुद्ध भएको छ । राजमार्गका ठाउँठाउँमा पहिरो जाँदा गाडी आवतजावत रोकिएको प्रहरीले जनाएको छ ।

सत्यवादी मावि भोपुरका चार विद्यार्थीसहित पाँच जना र केदारस्युँ गाउँपालिकाका एक जना गरी छ जना घाइते भएका जिल्ला प्रहरी कार्यालय बझाङले जनाएको छ । घाइतेहरूको जिल्ला अस्पतालमा उपचार भइरहेको छ ।

बझाङका प्रमुख जिल्ला अधिकारी (सीडीओ) नारायण पाण्डेयले आफूहरु भूम्कपबाट भएको क्षतिबारे विवरण लिने क्रममा रहेको बताए । मंगलबार दिउँसो ३ बजेर ६ मिनेट बझाङको चैनपुर केन्द्रबिन्दु भएर ६.३ म्याग्निच्युडको भूकम्प गएको थियो ।