- १४ जेष्ठ २०८३, बिहीबार / May 28, 2026
काठमाडौं । नेपालमा पहिलो पटक जंगली च्याउ पर्यटनको सुरुवात भएको छ । असार ५ देखि १८ गतेसम्म अमेरिकी, मेक्सिकन लगायतका पर्यटक र नेपाली च्याउविज्ञको टोलीले सगरमाथा आधार शिविर सम्मको यात्रा गरी च्याउको पारिस्थितिक प्रणाली अवलोकन गरेको हो ।
१४ जनाको टोलीले सल्लेरी हुँदै सगरमाथा आधार शिविर सम्मको पदयात्रा गरेको थियो । मनसुन सिजनमा च्याउ प्रशस्त उम्रने भएकाले अफसिजनमा समेत च्याउ पर्यटनले पर्यटक भित्र्याउन केही सघाउ पुर्यायो ।
टोलीले भ्रमणका क्रममा करिव १ सय ६० भन्दा बढी प्रजातिका जंगली च्याउको प्रत्यक्ष अवलोकन गरेको थियो । यसले सगरमाथा राष्ट्रिय निकुञ्ज क्षेत्रमा रहेको च्याउको संसार पर्यटकीय हिसावले प्रवर्द्धन गर्न प्रचुर सम्भावनायुक्त रहेको प्रष्टयाएको छ ।
च्याउ पर्यटनको सफल भ्रमण गरेर काठमाडौं फर्केका अमेरिकी पर्यटक एवं साउदर्न इडाहो माइकोलोजी एसोशिएसनका प्रवन्ध निर्देशक मिकी माइरे सगरमाथाको काखसम्मको अवलोकन अभुतपूर्व भएको बताए । जंगली च्याउको पर्यटनको सम्भाव्यता अध्ययन गरेर यसलाई प्रवर्द्धन र विकास गर्न सके स्थानीय पर्यटनलाई टेवा पुग्ने स्थानीयको भनाइ छ ।
