दशौं लाख मासिन मृत्युको मुखमा

काठमाडौं । अफगानिस्तानका दशौं लाख सर्वसाधारण मृत्युको मुखमा पुगेको संयुक्त राष्ट्रसंघले चेतावनी दिएको छ । अफगानिस्तानको आर्थिक संकटले दशौं लाखको ज्यान लिने अवस्था आउने राष्ट्रसंघका महासचिव एन्टोनियो गुटेरसले चेतावनी दिएका हुन ।

राष्ट्रसंघको ५ अर्ब डलरको मानवीय सहायता कोषमा सहयोग गर्न विश्व समुदायलाई अपिल गर्दै उनले अफगानिस्तानको रोक्का गरिएका खाताहरु फुकुवा गर्न विश्व बैंक, आइएमएफलगायतलाई आग्रह गरे । अत्यधिक चिसो र सम्पतिविहिन अवस्था अफगान जनताका लागि कहालिलाग्दो भएको पनि महासचिव गुटेरसको भनाइ छ ।

दाताको सहयोगमा टिक्दै आएको अफगानिस्तानको अर्थतन्त्र तालिवानले सत्ता कब्जा गरेपछि झन् अधोगतिमा रहेको छ । तालिवानको शासनलाई चुनौति दिन अमेरिकालगायत विश्व समुदायले अफगानिस्तानको सम्पति र खाता रोकेकाले अर्थतन्त्र चरम संकटमा फसेको बताइएको छ ।

अमेरिकाले मात्रै अफगानिस्तानको ७ अर्ब डलर रोकिदिएको छ । अस्पतालका चिकित्सक, सेना, पुलिस र सरकारी कर्मचारीले समेत तलब नपाईरहेको बुझिएको छ । राष्ट्रसंघका महासचिव गुटेरसले ८७ लाख अफगानीहरु अहिले पनि दुई छाक नपाउने अवस्थामा रहेको भन्दै त्यहाँको अर्थतन्त्रका लागि आवश्यक तरलता तत्काल उपलब्ध नगराउने हो भने अवस्था भयावह हुने चेतावनी दिए।