दुई वटा रेल ठोक्किँदा १५ जनाको मृत्यु

काठमाडौं । बङ्गलादेशमा दुई वटा रेल एकापसमा ठोक्किँदा १५ जनाको मृत्यु भएको छ । बन्दरगाह सहर चट्टोग्रामतर्फ गइरहेको कन्टेनर रेल आज दिउँसो करिब साढे ३ बजे ढाका गइरहेको एगरोसिन्धुर एक्सप्रेससँग ठोक्किएको हो ।

किशोरगञ्ज जिल्लामा दुर्घटना भएको जिल्ला अतिरिक्त प्रहरी उपरीक्षक मोस्ताक सरकारले जानकारी दिए । उनका अनुसार दुर्घटनामा एगरोसिन्धुर एक्सप्रेसका कयौँ डिब्बा पल्टिँदा करिब एक सय जना घाइते भएका छन् ।

उनले मर्नेहरूको सङ्ख्या अझै बढ्ने आशङ्का गरे । अधिकारीहरूका अनुसार जीवित अधिकांश यात्रीहरूलाई चोट लागेको छ र उनीहरूलाई अस्पताल पुर्याइएको छ । सयौँ स्वयंसेवक र स्थानीय बासिन्दा अग्निशमनकर्ताहरूसँग सहभागी भएर भग्नावशेषमा फँसेका मानिसलाई बचाउन सक्रिय भएका थिए ।