दैनिक मानव स्वास्थ्यमा विषाक्त वायुमण्डलको असर देखापर्दै

भक्तपुर । विश्वकै वायुमण्डल विषाक्त एवं प्रदूषित हुँदै गएको छ । मानविय गतिविधिको कारण वायुमण्डलमा हानिकारक कणहरु जम्मा भएको छ । धुलो, धुँवाले वायुलाई अशुद्ध मात्र होइन, विषाक्त बनाइरहेको छ । विषाक्त वायुमण्डलमा बस्नेहरु फोक्सो एवं स्वासप्रश्वाससम्बन्धी रोगका शिकार बन्दै गएका छन्।

नेपालको राजधानी काठमाडौं पनि प्रदुषित बन्दै गएको छ । मानवीय कारणले वायुमण्डल विषाक्त बन्दै गएपछि यसको असरसमेत पर्दै गएको छ । राजधानी नजिकैको जिल्ला भक्तपुरमा वातावरण विभागले गरेको जाँचका क्रममा ३७ दिन धूलोको कण राष्ट्रिय मापदण्डभन्दा बढी रहेको जनाएको छ । वातावरण विभाग अन्तर्गत वायु गुणस्तर मापन केन्द्रले गरेको अध्ययन अनुसार भक्तपुरमा २ सय १४ दिन वायुको गुणस्तर मापन गर्दा ३७ दिन मापदण्ड भन्दा बाहिर रहेको जनाएको हो ।

नेपालमा सरकारले तोकेको मापदण्ड अनुसार हावामा पाइने मसिना कण पार्टिकुलट म्याटर (पीएम) २.५ को दैनिक औसत मापदण्ड ४० माइक्रोग्राम प्रति घनमिटर हुनुपर्ने मापदण्ड रहेको छ । वायुप्रदूषणका कारण गर्भको बच्चाले समेत असर पर्ने देखिएको छ । बढ्दो वायु प्रदुषणको असर गर्भमा रहेको बच्चामा बच्चामा वौद्धिक तथा शारीरिक अपाङ्गता हुने खतरा बढेको विज्ञहरुले बताएका छन् ।