- ६ आश्विन २०८३, मंगलवार / Sep 22, 2026
काठमाण्डौ । नवौँ राष्ट्रिय खेलकुद प्रतियोगिताको खर्च सार्वजनिक भएको छ । नवौं राष्ट्रिय खेलकुद प्रतियोगितामा झण्डै ५४ करोड रुपैयाँ खर्च भएको राष्ट्रिय खेलकुद परिषद् (राखेप) ले सार्वजनिक भएको हो । प्रतिनिधि, खेलाडी, प्रशिक्षक र व्यवस्थापकको खाना तथा बसोबासमा मात्र १३ करोड १७ लाख रुपैयाँ खर्च भएको छ । खेल सामग्रीमा २ करोड रुपैयाँ खर्च भएको विवरण सार्वजनिक गरिएको छ ।
किट्स ब्याग, निर्णायक जर्सी र खेल पोसाकका लागि १५ करोड ३९ लाख रुपैयाँ खर्च भएको विवरणमा उल्लेख छ । गण्डकीको कास्कीलगायत ८ जिल्लामा सञ्चालन भएको नवौँ राष्ट्रिय खेलकुदको असोज २८ मा उद्घाटन र कात्तिक ३ गते समापन भएको थियो । राखेपले गण्डकीमा गएको वर्ष भएको राष्ट्रिय खेलकुद प्रतियोगिताको खर्च बुधबार सार्वजनिक गरेको हो ।
राखेपका सदस्य सचिव टङ्कलाल घिसिङले प्रतियोगितामा ५३ करोड ७९ लाख रुपैयाँ खर्च भएको जानकारी दिए । सरकारबाट ६० करोड १० लाख रुपैयाँ प्राप्त भएको र आन्तरिक रुपमा ५१ लाख ५२ हजार रुपैयाँ आम्दानी भएको उनले जानकारी दिए । राखेपले २१ वटा शीर्षकमा खर्च विवरण उल्लेख गरेको छ ।
