- ३१ असार २०८३, बुधबार / Jul 15, 2026
काठमाडौं । नेपाल मजदुर किसान पार्टीका सांसद प्रेम सुवालले नेपाली काँग्रेस कसरी प्रतिपक्ष दल भयो भन्दै प्रश्न गरेका छन् । मंगलबार प्रतिनिधि सभामा बोल्दै सांसद सुवालले प्रधानमन्त्रीलाई विश्वासको मत दिने नेपाली काँग्रेस कसरी विपक्षी दल भयो भन्दै प्रश्न गरेका हुन ।
उनले संघीय संसद् सचिवालयका कर्मचारीको नियतमाथि समेत प्रश्न समेत गरेका छन् । संघीय संसद् सचिवालयले नेपाली कांग्रेसका सभापति शेरबहादुर देउवालाई विपक्षी दलको नेता भनेपछि सांसद सुवाल आक्रोषित भएका हुन ।
सांसद सुवालले संघीय संसद्का कर्मचारीले सभामुखलाई अप्ठेरोमा पार्ने काम किन गर्दैछन् भन्दै प्रश्न समेत गरे । सरकारलाई कांग्रेसले विश्वासको मत दिएका कारण कांग्रेस प्रमुख प्रतिपक्षी दल हुन नसक्ने तर्क गर्दै सांसद सुवालले नेमकिपालाई प्रमुख प्रतिपक्षी दलको मान्यता दिन सभामुखसंग माग गरे ।
सांसद सुवालले संघीय संसद्का पदाधिकारी तथा सदस्यहरुको पारिश्रमिक र सुविधा सम्बन्धी ऐन २०७३ को दफा २ अनुसार सरकारलाई विश्वासको मत दिने नेपाली कांग्रेस प्रमुख प्रतिपक्षी दल कसरी हुन्छ भन्दै प्रश्न गर्दै संसद्ले बनाएको कानुन संसदमै लागू हुन नसकेको आरोप लगाए । उनले भने “अन्य ठाउँमा कानुन कार्यान्वयन कसरी हुन सक्छ देशको संसदको हालत यस्तो छ ?”
