- २९ भाद्र २०८३, सोमबार / Sep 14, 2026
काठमाडौं, २८ साउन। कर्णाली प्रदेशमा आयोजना हुने १०औँ राष्ट्रिय खेलकुद प्रतियोगिताको मिति फेरि सरेको छ। राष्ट्रिय खेलकुदको मिति पाँचौँ पटक तोकिएको हो।
युवा तथा खेलकुदमन्त्री सस्मित पोखरेलको अध्यक्षतामा बिहीबार बसेको राष्ट्रिय खेलकुद परिषद् (राखेप) को १२५औँ बोर्ड बैठकले १०औँ राष्ट्रिय खेलकुद प्रतियोगिता आगामी मङ्सिर १६ देखि २९ गतेसम्म आयोजना गर्ने निर्णय गरेको छ।
२०७९ साल असोज २८ देखि कात्तिक ३ गतेसम्म गण्डकी प्रदेशमा नवौँ राष्ट्रिय खेलकुद प्रतियोगिता आयोजना भएको थियो। त्यसपछि १०औँ राष्ट्रिय खेलकुद आयोजना गर्ने जिम्मेवारी कर्णाली प्रदेशले पाएको थियो।
कर्णालीले प्रतियोगिता आयोजनाको झण्डा पाएपछि राखेपको ११५औँ बोर्ड बैठकले २०८१ साल मङ्सिर २ देखि ९ गतेसम्म प्रतियोगिता आयोजना गर्ने निर्णय गरेको थियो। तर आवश्यक खेल पूर्वाधार तथा अन्य तयारी पूरा हुन नसकेपछि निर्धारित समयमा प्रतियोगिता आयोजना हुन सकेन। त्यसपछि पटक–पटक प्रतियोगिताको मिति सारिँदै आएको छ।
पछिल्लो पटक राखेपको १२३औँ बोर्ड बैठकले गएको वैशाखमा १०औँ राष्ट्रिय खेलकुद आयोजना गर्ने मिति तोकेको थियो। तर उक्त मितिमा समेत प्रतियोगिता आयोजना हुन नसकेपछि बिहीबार बसेको बोर्ड बैठकले पुनः नयाँ मिति तय गरेको हो।
कर्णाली प्रदेशमा आयोजना हुने १०औँ राष्ट्रिय खेलकुदका लागि आवश्यक पूर्वाधार तथा व्यवस्थापनको तयारीलाई तीव्रता दिइने राखेपले जनाएको छ। १०औँ राष्ट्रिय खेलकुद आयोजना पटक–पटक सर्दै गएपछि खेलाडी तथा खेल क्षेत्रका सरोकारवालाले प्रतियोगिता तोकिएको नयाँ मितिमै आयोजना हुने वातावरण बनाउन माग गर्दै आएका छन्।
