मलेसियाले श्रमिक भर्ना अवधि छोट्याउने, विज्ञापन गर्न १ दिनको समय

मलेसिया । सरकारले विदेशी श्रमिक भर्ती गर्ने समयावधि छोट्याउने भएको छ ।

श्रमिक भर्ना गर्न दुई महिना भन्दा पनि लामो समय लाग्ने गरेको भन्दै यसलाई छोट्याएर ३० दिनभित्रै श्रमिक भर्ना गर्ने गरी काम भइरहेको सञ्चारमाध्यले बताएका छन् ।

श्रमिक भर्तीको सम्पूर्ण प्रक्रियालाई घटाउने मलेसियाका गृहमन्त्री दातुक सेरी साइफुद्धिनले बताए ।

अब रोजगारदाताले निवेदन पेस गर्नेदेखि स्वीकृति, भिसा जारी गर्ने, स्वास्थ्य परीक्षण लगायत सबै काम एक महिनाभित्रै सकिनेछ ।

मलेसियाका मानव संसाधन मन्त्री वी शीवकुमारसँगको संयुक्त बैठकमा गृहमन्त्रीले यो लामो प्रक्रियालाई छोट्याउने धेरै ठाउँहरु रहेको उल्लेख गरे ।

बैठकमा उनले भने, ‘श्रमिक भर्नाको लागि विज्ञापन गर्नमै रोजगारदाताले पहिले एक महिना लगाउँथे, अबका दिनमा त्यो काम एक दिन मात्रै हुनेछ ।’ यसै गरी अरु प्रक्रिया पनि छोट्याइने बताए ।